म. टा. प्रतिनिधी, नाशिक
बांधकाम परवानगीची माहिती नागरिकांना तत्काळ मिळावी, यासाठी महापालिकेच्या नगर नियोजन विभागामार्फत डॅशबोर्ड अॅप्लिकेशन कार्यान्वित करण्यात आले आहे.
बांधकाम व्यावसायिक, वास्तुविशारद, नागरिक यांना आपल्या विविध विकसन परवानगी, इमारत बांधकाम परवानगी व इतर परवानग्या देण्याचे कामकाज महापालिकेतील नगर नियोजन विभागामार्फत करण्यात येते. या कामात पारदर्शकता, अचुकता व गतिमानता येण्यासाठी महापालिकेने ऑटोडीसीआर कार्यप्रणाली विकसित केली आहे. बांधकामाबातच्या प्रस्तावांचे सद्य:स्थितीत अवलोकन होण्यासाठी महापालिकेच्या www.nmc.gov.in या संकेतस्थळावर बिल्डिंग प्लॅन या सदरांतर्गत डॅशबोर्ड उपलब्ध करून दिला आहे. या डॅशबोर्डचा वापर करून नागरिकांना महापालिकेस सादर केलेल्या विकसन प्रस्तावाच्या प्राप्तता, प्रक्रिया, स्विकृती, प्रलंबिततेबाबतची स्थिती जाणून घेता येईल. तसेच सर्व नागरिकांना कामकाजाची माहिती ऑनलाइन बघता येणार आहे.