भाजप नगरसेवकांचीच होणार पालिकेत कोंडी
-
म.टा.खास प्रतिनिधी,नाशिक
भाजपने शहराध्यक्षपदावर गिरीश पालवे यांच्या रुपाने नवीन चेहऱ्याला संधी दिली असली तरी,त्यांच्या नियुक्तीने पक्षातही वाद निर्माण होण्याची शक्यता आहे.पालवे यांच्याकडून पालिकेत अनेक कंत्राटे घेण्यात आली असून ती कंत्राटे वादग्रस्त ठरल्याने आता पालिकेतील नगरसेवकांचीही कोंडी झाली आहे.शहरात वादग्रस्त ठरलेला पंचवटी आणि सिडकोतील घंटागाडीचा वादग्रस्त ठेका हा जी.टी.पेस्ट कंट्रोल कंपनीकडून चालविण्यात येतो.सदरची कंपनीही पालवे यांची असून सध्या गायकवाड नामक इसमाकडून ती चालविली जाते.सिडको आणि पंचवटीतल्या अनियमीत घंटागाडी बाबत खुद्ध भाजपच्याच नगरसेवकांच्या तक्रारी आहेत.प्रभाग समिती,स्थायी समिती आणि महासभांमध्ये या घंटागाडीच्या ठेक्यावरून नेहमीच आरोप प्रत्यारोप होतात. अनियमित घंटागाडी येत असल्याने आणि नियमांचे उल्लंघन केल्याप्रकरणी जी.पी.पेस्ट कंट्रोलला दोन कोटींचा दंडही करण्यात आला असून या दंड कंपनीच्या बिलातून वळता केला जात आहे. पालवे यांच्या कंपनीकडून यापूर्वीही मलेरिया विभागात धूरफवारणी करण्याचे काम घेण्यात आले होते.या कामाबाबतही नगरसेवकांच्या तक्रारी होत्या.त्यामुळे नवीन ठेकेदाराला हे काम देण्यात आले.पालवे यांचे नाव शहराध्यक्षपदासाठी चर्चेला आल्यानंतर पालवे यांच्या या कामांचा 'चिठ्ठा' प्रदेश पातळीवर पोहचवण्यात आला होता.परंतु,जातिय समीकरणे आणि भाजपच्या नाशिकमधील प्रदेश पातळीवर काम करणाऱ्या एका नेत्यांने पालवे यांच्या पारड्यात वजन टाकल्याने त्यांची नियुक्ती झाल्याची चर्चा आहे.परंतु.या नियुक्तीमुळे सर्वात मोठी कोंडी ही भाजपच्या नगरसेवकांचीच होणार आहे.आपल्याच पक्षाच्या नेत्यांच्या ठेक्याबद्दल आता काय बोलायचे अशी प्रतिक्रिया आता भाजप नगरसेवकांकडून व्यक्त केली जात आहे.