अपघातात बापलेक जखमी
म. टा. खास प्रतिनिधी, नाशिक
भरधाव अज्ञात चारचाकी वाहनाने दिलेल्या धडकेत बापलेक जखमी झाल्याची घटना नवीन नाशिकच्या सिंहस्थनगर परिसरात बुधवारी (दि. १५) पहाटे घडली.
मोहम्मद हसन चौधरी (वय ४८) व त्यांची मुलगी नसरीन (रा. सिंहस्थनगर, नवीन नाशिक) अशी जखमींची नावे आहेत. चौधरी यांनी दिलेल्या तक्रारीनुसार ते बुधवारी पहाटे दुचाकीवरून मुलीसह जात असताना भरधाव आलेल्या पांढऱ्या रंगाच्या कारने त्यांना समोरून धडक दिली. यामध्ये दोघे जखमी झाले. या प्रकरणी अंबड पोलिस ठाण्यात अज्ञात कार चालकावर गुन्हा दाखल करण्यात आला आहे.
महिलेवर चाकू हल्ला
शेतात पाइपलाइन फुटल्याच्या कारणावरून तिघांनी महिलेस बेदम मारहाण करून चाकूने हल्ला केला. ही घटना तालुक्यातील जोगल टेंभी येथे घडली. हेमंत रामनाथ ताजणे (वय २७), रामनाथ ताजणे (वय ४२) व लता रामनाथ ताजणे (रा. सर्व जोगल टेंभी) अशी गुन्हा दाखल करण्यात आलेल्या संशयितांची नावे आहेत. या प्रकरणी पुजा ताजणे यांनी तक्रार दाखल केली आहे. ताजणे यांच्या शेतात सामाइक पाइपलाइन फुटल्याच्या कारणावरून बुधवारी दुपारी पावने दोन वाजेच्या सुमारास वाद सुरू झाला. यावेळी तिघांनी मिळून फिर्यादी ताजणे यांना बेदम मारहाण केली. तसेच चाकूने त्यांच्या खांद्यावर मारून गंभीर जखमी केले. या प्रकरणी नाशिकरोड पोलिस ठाण्यात गुन्हा दाखल करण्यात आला आहे.
--
महिलेचा मृत्यू
अंघोळ करताना विजेचा धक्का लागल्याने महिलेचा मृत्यू झाल्याची घटना तालुक्यातील बेळगाव ढगा परिसरात बुधवारी (दि.१५) सकाळी घडली. वंदना संतोष गांगुर्डे (३०, रा. बेळगाव ढगा, ता. नाशिक) असे या घटनेत मृत्यू झालेल्या महिलेचे नाव आहे. बुधवारी सकाळी गांगुर्डे या अंघोळ करीत असताना तारेच्या वळणीत विजेचा प्रवाह उतरून त्यांना धक्का बसला. त्यांना उपचारासाठी तत्काळ जिल्हा रुग्णालयात दाखल करण्यात आले. मात्र डॉक्टरांनी तपासून त्यांना मृत घोषीत केले. या प्रकरणी सातपूर पोलिस ठाण्यात आकस्मात मृत्यूची नोंद करण्यात आली आहे.