म. टा. प्रतिनिधी, नाशिक
कृषी उत्पन्न बाजार समितीमधील कर्मचाऱ्यांचा महागाई भत्ता आणि बोनसमधील ५८ लाखांच्या रक्कम अपहार प्रकरणात तब्बल साडेतीन महिन्यांपासून नाशिकरोड मध्यवर्ती कारागृहात असलेले कृऊबाचे सभापती तथा माजी खासदार देवीदास पिंगळे यांना पुन्हा प्रकृती अस्वस्थामुळे आज (दि.२०) जिल्हा रूग्णालयात दाखल करण्यात आले आहे. कृषी उत्पन्न बाजार समितीच्या १२८ कर्मचाऱ्यांचा महागाई भत्ता आणि बोनसच्या रकमेचा पिंगळे यांनी अपहार केल्याप्रकरणी गुन्हा दाखल करण्यात आला आहे. जिल्हा न्यायालय तसेच उच्च न्यायालयाने जामीन अर्ज फेटाळल्याने पिंगळे कारागृहात असून, त्यांची प्रकृती अचानक बिघडल्याने रुग्णालयात दाखल करण्यात आले.
आदिवासी सेवक पुरस्कार जाहीर
म. टा. खास प्रतिनिधी, नाशिक
आदिवासींच्या सर्वांगीण विकासासाठी उल्लेखनीय कार्य करणाऱ्या व्यक्ती व सामाजिक संस्थासाठीच्या आदिवासी सेवक पुरस्कारांची घोषणा आदिवासी विभागाने केली आहे. चालू वर्षी तब्बल १६ व्यक्तींना आदिवासी सेवक पुरस्कार तर सात संस्थाना आदिवासी सेवा संस्था पुरस्कार जाहीर करण्यात आले आहेत. नाशिकच्या वनवासी कल्याण आश्रमासह नंदूरबारच्या डॉ. हेडगेवार सेवा समितीचा यात समावेश आहे. सोबत नाशिकच्या डॉ. प्रमोद गायकवाड यांनाही आदिवासी सेवक पुरस्कार जाहीर करण्यात आला आहे. आदिवासी सेवक पुरस्कारार्थींना २५ हजार तर सामाजिक संस्थाना ५० रुपये पुरस्कार म्हणून दिले जातात. मंचर येथील शाश्वत संस्था, पालघर येथील विवेक रुरल डेव्हलपमेंट संचलित राष्ट्र सेवा समिती, गडचिरोलीतील आम्ही आमच्या आरोग्यासाठी, पुणे यथील सुयश चॅरिटेबल ट्रस्टला पुरस्कार जाहीर झाले आहेत.