म. टा. प्रतिनिधी, नाशिक
बस थांब्यावर उभ्या असलेल्या वृद्ध प्रवाशास अॅटो रिक्षाने धडक दिली. यात त्याचा मृत्यू झाला. अपघाताची घटना आंबेडकर नगर परिसरात झाली असून, या प्रकरणी उपनगर पोलिस स्टेशनमध्ये अपघाताचा गुन्हा दाखल करण्यात आला.
जनार्दन भागाजी रोकडे (७२, रा. तेजाळे चौक, मोठा राजवाडा) असे अपघातात मृत्यू झालेल्या वृद्धाचे नाव आहे. रोकडे हे आंबेडकरनगर येथे नातेवाइकांना भेटण्यासाठी रविवारी गेले होते. रात्री परतीच्या प्रवासासाठी ते बसथांब्यावर उभे असतांना हा अपघात झाला. आंबेडकरनगर बस थांब्यावर ते बसच्या प्रतिक्षेत असतांना अज्ञात भरधाव रिक्षाने त्यांना धडक दिली. या अपघातात गंभीर जखमी झाल्याने कुटुंबीयांनी त्यांना तात्काळ आडगाव येथील वसंतराव पवार मेडिकल कॉलेज येथे दाखल केले होते. यानंतर त्यांना सिव्हिल हॉस्पिटलमध्ये सोमवारी दुपारी दाखल करण्यात आले. मात्र, डॉक्टरांनी तपासून त्यांना मृत घोषीत केले.