म. टा. प्रतिनिधी, नाशिक
नाशिक जिल्हा रुग्णालयातील स्वाइन फ्लू कक्षात उपचार घेत असताना सत्यभामा पडोळ (वय ६८, रा. एरंडगाव, ता. येवला) यांचा मृत्यू झाला. स्वाइन फ्लूच्या उपचारासाठी त्यांना रविवारी (दि. ९) रुग्णालयात दाखल करण्यात आले होते. उपचार सुरू असताना गुरुवारी (दि. १३) त्यांचा मृत्यू झाला. जिल्ह्यात स्वाइन फ्लूच्या रुग्णांची संख्या दिवसेंदिवस वाढत आहे. जिल्हा रुग्णालयातील स्वाइन फ्लू कक्षात १८ रुग्ण उपचार घेत आहेत. दरम्यान, स्वाइन फ्लूच्या रुग्णांची वाढती संख्या लक्षात आरोग्य विभागाने महापालिकेच्या जुन्या नाशिक परिसरातील जाकीर हुसेन रुग्णालयात स्वाइन फ्लू उपचार कक्ष सुरू केला आहे. गेल्या दोन दिवसांत स्वाइन फ्लू आराजाने जिल्ह्यातील तीन रुग्णांचा मृत्यू झाला आहे. त्यामुळे स्वाइन फ्लूबाबत दक्षता घेण्याचे आवाहन महापालिकेच्या आरोग्य विभागातर्फे करण्यात आले आहे.