म. टा. प्रतिनिधी, नाशिक
जानोरी गावात भेसळयुक्त दारू विक्री होत असून त्यामुळे काही लोक दगावण्याचे प्रकार घडल्याचा आरोप ग्रामस्थ महिलांनी केला आहे. हे दुकान त्वरित बंद करा, अशी मागणी करीत या महिलांनी महाराष्ट्र राज्य दारूबंदी जनआंदोलनच्या माध्यमातून राज्य उत्पादन शुल्कच्या कार्यालयासमोर निदर्शने केली.
जानोरी गावातील सरकारमान्य देशी दारूच्या दुकानात भेसळयुक्त दारूची विक्री सुरू असल्याचा दावा करीत शेकडो महिला शरणपूर रोडवरील राज्य उत्पादन शुल्क कार्यालयात पोहोचल्या. या दारू दुकानामुळे गावातील शांतता धोक्यात आली आहे. या दारू दुकानाजवळून जाताना महिलांना अधिक गैरसोयींचा सामना करावा लागत आहे. गावातील हे दुकान तात्काळ बंद करावे किंवा ते गावाबाहेर स्थलांतरित करावे, अशी मागणी ग्रामस्थ महिलांसह दारूबंदी जनआंदोलनचे गणेश कदम, शैला उफाडे आदींनी केली आहे.
फोटो : पंकज चांडोले