खताच्या दुकानाला देवळ्यात आग

म. टा. वृत्तसेवा, कळवण

देवळा येथील बाजार समितीच्या गाळ्यांमधील आनंद अॅग्रो या बियाणे व खतांच्या दुकानाला सोमवारी पहाटे आग लागली. या आगीत २५ लाखांचे नुकसान झाल्याचा अंदाज आहे. शॉर्टसर्किटमुळे हा अपघात झाला.

बाजार समितीचे संचालक जगदीश पवार यांचे हे दुकान आहे. ते रविवारी रात्री आठ वाजता दुकान बंद केले. सोमवारी पहाटे तीन वाजता कळवण रस्त्यावरील संजय आहेर यांच्या घराकडे चोर आल्याचा संशयामुळे परिसरातील नागरिक सतर्क झाले होते. त्यातच बाजार समितीच्या गाळ्यांमध्ये आग लागल्याचे प्रदीप आहेर यांच्या लक्षात आले. त्यांनी तत्काळ देवळा पोल‌िस ठाण्यासह पवार यांनाही कळविले. पोल‌िस निरीक्षक गुलाबराव पाटील यांनी घटनास्थळी धाव घेऊन सटाणा अग्निशमन दलाला फोन बोलावून घेतले. तोपर्यंत परिसरातील नागरिकांनी खासगी टँकरच्या मदतीने आग विझविण्याचा प्रयत्न केला. पहाटे साडेचार वाजता सटाणा येथील अग्निशमन बंब पोहोचले. तब्बल चार तासांच्या प्रयत्नानंतर सकाळी साडेसात वाजता आग आटोक्यात आली. आगीत दुकानातील खतांसह जवळपास २५ लाखांचे नुकसान झाल्याचा प्राथमिक अंदाज आहे.