सटाण्यात यात्रोत्सवास सुरुवात; भाविकांच्या प्रचंड गर्दीने नियोजन कोलमडले
म. टा. वृत्तसेवा, सटाणा
पहाटेचे शांत वातावरण...हवेत गारवा पसरलेला...दारोदारी सडा-रांगोळी अन् बागलाणचे आराध्यदैवत श्री संत शिरोमणी देवमामलेदार यशवंतराव महाराज यांच्या मंदिरात महाराजांचा जयघोष...अशा मंगलमय वातावरणात रविवारी आरमतटी देवमामलेदार यशवंत महाराजांच्या यात्रोत्सवास सुरुवात झाली. महाराजांच्या जयजयकाराने संपूर्ण सटाणा दुमदुमले होते. महापूजानंतर उपस्थित भाविकांना मंदिरातील गाभारा दर्शनासाठी खुला करण्यात आला.
बागलाणचे आराध्यदैवत श्री संत शिरोमणी देवमामलेदार यशवंतराव महाराज यांच्या १३३ व्या पुण्यतिथी सोहळ्यानिमित्ताने रविवारी पहाटे महाराजांच्या मूर्तीचा महाअभिषेक सोहळ्याने यात्रोत्सव सोहळ्यास प्रारंभ झाला. रविवार सुटीचा दिवस असल्याने पहाटेपासूनच महिलांसह पुरुष व बालगोपाळांची तुडूंब गर्दी झाल्याने अक्षरश: नियोजन कोलमडले. बागलाणचे तहसीलदार जितेंद्र पाटील इंगळे व सुप्रिया इंगळे, विश्वस्त तथा अध्यक्ष भालचंद्र बागड व अरुणा बागड, नगराध्यक्ष सुनील मोरे व योगीता मोरे, उपाध्यक्ष रमेश सोनवणे व कुसूम सोनवणे यांच्या हस्ते पहाटे महापूजा झाली. महापुजेचे पौराहित्य वेदमूर्ती राजेंद्र कुलकर्णी, शेखर मुळे, गजानन जोशी, मकरंद पाठक, पंकज इनामदार, धनंजय पंडित, संजय चंद्रात्रे, अमोल मुळे यांनी केले.
महापूजा व यात्रोत्सव रविवारी आल्याने भल्या पहाटे भाविकांची प्रचंड गर्दी झाली होती. भाविकांना उभे राहण्यासाठी जागा नसल्याने काही भाविक रस्त्यावर उभे होते. यामुळे पुढील वर्षी देवस्थानने परिसरात ठिकठिकाणी पहाटे पूजा बघण्यासाठी स्क्रीन लावण्याचा निर्णय घेतला आहे. सकाळपासूनच मंदिराबाहेर पूजा साहित्य, प्रसाद विक्री करणाऱ्यांनी गर्दी केल्याने भाविकांना दर्शनासाठी वाट काढत जावे लागत होते. देवस्थानाबाहेर श्री यशवंतराव महाराज सार्वजनिक युवक मित्र मंडळाच्या वतीने महाप्रसाद वाटप करण्यात आले. तसेच रक्तदानासाठीही भाविकांना आवहन करण्यात आले. भाक्षी रोड येथील साई भक्त परिवाराच्या वतीने दूधवाटप करण्यात आले.
भाविक तल्लीन
येवला येथील भक्त मंडळाच्या वतीने पहाटेपासूनच अभंगवाणी, भक्तगितांची मैफल सुरू होती. भक्तगण तल्लीन होवून टाळमृदृंगाच्या ठेक्यावर नाचत होती. मंदिरावर आकर्षक विद्युत रोषणाई, परिसरात वेगवेगळ्या रेखीव रांगोळ्या तसेच हजारो दिव्यांनी परिसर उजळून निघाला होता.
महाराजांच्या खुर्चीची पूजा
भाविकांना कोणतीही गैरसोय होवू नये, तसेच परिसरात शांतता रहावी यासाइी सटाणा पोलिस निरीक्षक नंदकुमार गायकवाड लक्ष ठेवून होते. महिला पोलिस देखील या ठिकाणी तैनात करण्यात होते. ठिकठिकाणी सीसीटीव्ही कॅमेरे बसविण्यात आले आहेत.
महापुजेनंतर तहसील कार्यालयातील तहसीलदारांच्या दालनातील देवमामलेदार यशंवतराव महाराज यांच्या काळातील खूर्चीचीही तहसीलदार जितेंद्र इंगळे पाटील व डॉ. सुप्रिया इंगळे यांच्या हस्ते पूजा करण्यात आली. याप्रंसगी महसूल कार्यालयातील सर्व कर्मचारी व तलाठी उपस्थित होते. तसेच तहसील कचेरी व पोलिस स्टेशनच्या आवारात असलेल्या देवमामलेदार यशवंतराव महाराज मंदिारात देखील पहाटे पोलिस निरीक्षक नंदकुमार गायकवाड व अन्नपूर्णा गायकवाड यांनी महापूजा केली.