पेलिकन पार्कची साडेसाती संपेना
फलक काढल्याने विभागीय कार्यालयात ठिय्या
प्रभागाच्या नगरसेवकाने दबाव आणल्याचा आरोप
...
म. टा. वृत्तसेवा, सिडको
वादग्रस्त ठरलेल्या पेलिकन पार्कच्या जागेवर नव्याने काम सुरू असतानाच या पार्कच्या नामकरणावरून वादंग उभे राहिले आहे. शिवजयंती निमित्ताने काही शिवप्रेमींनी या ठिकाणी छत्रपती शिवाजी महाराज उद्यान अशा नामकरणाचा फलक लावला होता. मात्र गुरुवारी मनपाने तो फलक काढून टाकल्याने सर्वपक्षीयांच्या वतीने विभागीय कार्यालयात ठिय्या आंदोलन करण्यात आले. अखेरीस प्रशासनाने हा फलक परत दिल्यानंतर आंदोलन थांबवित येथे पुन्हा फलक उभारण्यात आला आहे. याबाबतची पुढील दिशा ठरविण्यासाठी शनिवारी बैठकीचे आयोजन केले आहे. दरम्यान, हा फलक प्रभागातील नगरसेवकांच्या दबावामुळे काढण्यात आला असल्याचा आरोप शिवप्रेमींनी केला आहे.
सिडकोतील मोरवाडी परिसरात १७ एकर जागेवर उभारलेले पेलिकन पार्क अनेक वर्षांपासून बंद पडले होते. मागील वर्षी आमदार सीमा हिरे आणि प्रभागातील नगरसेवक मुकेश शहाणे यांनी या कामाचा पाठपुरावा करीत निधी उपलब्ध करून निवडणुकीपूर्वीच या कामाचा प्रारंभ केला. मात्र हे काम सुरू झाले असले तरी या पार्कला नाव देण्यावरून वाद होत आहेत. सध्या या उद्यानाला सेंट्रल पार्क नावाने संबोधण्यात येते. मात्र बुधवारी सिडकोतील राष्ट्रवादी युवक काँग्रेसच्या पदाधिकाऱ्यांनी शिवजयंतीचे औचित्य साधून या पार्कच्या आवारात छत्रपती शिवाजी महाराज उद्यान असा फलक लावून या पार्कचे एकप्रकारे नामकरणच केले होते. हा प्रकार प्रशासनाच्या लक्षात आल्यानंतर मनपा विभागीय अधिकारी सोमनाथ वाडेकर यांनी अतिक्रमण विभागाच्या माध्यमातून पोलिस बंदोबस्तात हा फलक काढून जप्त केला. फलक गायब झाल्यामुळे सिडकोतील संतप्त सर्वपक्षीय शिवप्रेमींनी महापालिकेच्या विभागीय कार्यालयात धाव घेतली. सुरुवातीला हा फलक परत मिळावा आणि तो त्या ठिकाणी लावण्यात यावा, अशी मागणी शिवप्रेमींनी केली. मात्र प्रशासनाने फलक देण्यास नकार दिल्याने हे आंदोलन चिघळले.
या आंदोलनाची माहिती मिळाल्यानंतर सुरगाण्याच्या राजघराण्यातील सोनालीराजे पवार यांनीसुद्धा विभागीय कार्यालयात धाव घेतली. त्यानंतर पवार, माजी नगरसेवक मामा ठाकरे, संजय भामरे यांच्यासह राष्ट्रवादी युवक काँग्रेसचे विशाल डोके यांनी व शिवप्रेमींनी अधिकाऱ्यांशी चर्चा करून हा फलक परत देण्याची मागणी केली. हा फलक या प्रभागातील नगरसेवकांच्या दबावाखाली काढण्यात आल्याचा आरोप शिवप्रेमींनी केला. तसेच सदर व्यक्तीचे नाव सांगा आणि हा फलक पुन्हा त्याच ठिकाणी बसवा, अशी मागणी करीत या ठिकाणी शिवप्रेमींनी ठिय्या आंदोलन केले. अखेरीस आंदोलकांचा दबाव वाढत गेल्यामुळे प्रशासनाने हा फलक पुन्हा त्यांच्या ताब्यात दिला. त्यानंतर सर्व शिवप्रेमींनी हा फलक पुन्हा पार्कच्या जागी नेऊन बसवला.
...
शिवजयंतीच्या दिवशी लावलेला फलक काढणे हा अत्यंत चुकीचा प्रकार आहे. शिवाजी महाराजांचे नाव ऐकून रक्त सळसळते. या घटनेचा आम्ही निषेध करतो.
- सोनालीराजे पवार
...
कोणतीही परवानगी न घेता हा फलक लावला होता. कायदा व सुव्यवस्थेचा विचार करून पोलिस बंदोबस्तात हा फलक काढण्यात आला. मात्र शिवप्रेमींनी केलेल्या आंदोलनानंतर हा फलक परत दिला आहे.
- सोमनाथ वाडेकर, विभागीय अधिकारी
...
पेलिकन पार्कच्या जागेवर छत्रपती शिवाजी महाराज उद्यान हा फलक लावला होता. हा फलक प्रशासनाने काढणे ही दुर्दैवी गोष्ट आहे. या घटनेचा आम्ही निषेध करतो.
- संजय भामरे, सामाजिक कार्यकर्ते
...
पेलिकन पार्कला सेंट्रल पार्कऐवजी छत्रपती शिवाजी महाराज उद्यान म्हणण्यात यावे, अशी आमची मागणी आहे. त्यामुळेच हा फलक लावला होता. मात्र प्रशासनाने फलक काढून शिवप्रेमींच्या भावना दुखावल्या आहेत.
- विशाल डोके, राष्ट्रवादी युवक काँग्रेस पदाधिकारी
....
फलक काढण्याचे आदेश देणाऱ्या व्यक्तीचे नाव आठ दिवसांत प्रशासनाने जाहीर करावे. अन्यथा काळे फासण्यात येईल. तसेच या महासभेत संबंधिताचे नाव सांगितले जात नाही तोपर्यंत ठिय्या आंदोलन केले जाईल.
- मुकेश शहाणे, नगरसेवक