म. टा. खास प्रतिनिधी, नाशिक
देशव्यापी संपात जिल्हा परिषदेच्या १३ हजार ९०३ कर्मचाऱ्यांपैकी ३४९८ जण संपावर होते. हा आकडा २५ टक्क्यांच्या आसपास आहे. संपामुळे जिल्हा परिषदेच्या कामकाजावर मात्र परिणाम झाला. जिल्हाभरातील कामगारांच्या संपाची आकडेवारी सायंकाळी जिल्हा परिषदेने दिली.
जिल्हा परिषदेचे नाशिक येथील मुख्यालय, तालुक्यातील पंचायत समिती, आरोग्य विभाग, शिक्षण विभाग, पशुसंवर्धन विभाग यांसारख्या सर्व विभागांत किती कर्मचारी संपात सहभागी होते, याबद्दल प्रशासनाने माहिती गोळा केली. गट क वर्गातील ११ हजार ९९० कर्मचाऱ्यांपैकी २ हजार ९१९ कर्मचारी संपावर असल्याचे आढळले, तर गट ड वर्गातील १८१४ कर्मचाऱ्यांपैकी ५७६ कर्मचारी संपावर होते. या संपात सर्व अधिकाऱ्यांनी संपापासून चार हात दूर राहणे पसंत केले. कामगारांच्या या संपात केंद्रीय कायद्याचा समावेश असून, त्याचा आमच्याशी संबंध नाही अशी भूमिका जिल्हा परिषदेच्या कर्मचारी संघटनेने घेतली होती. त्यामुळे नांदेड येथे झालेल्या संमेलनातच या संपात सहभागी न होण्याचा निर्णय झाल्याचे या कर्मचारी संघटनेच्या पदाधिकाऱ्यांनी सांगितले.
राज्यात नवीन सरकार आहे. त्यामुळे आमच्या मागण्या त्यांच्याशी संबंधित आहे. त्यामुळे केंद्रीय पातळीवरच्या या संपात आम्ही सामील झालो नाही. सहभागी होणाऱ्यांची संख्या कमी होती.
- विजय हळदे, जिल्हा परिषद कर्मचारी संघटना