मालेगाव नाशिकमध्ये 'सीवायडीए'चे योगदान
म. टा. प्रतिनिधी, नाशिक
सेंटर फॉर युथ डेव्हलपमेंट ॲण्ड ॲक्टिव्हिटीज, पुणे या संस्थेतर्फे नाशिक व मालेगावमधील गरजूंना जीवनाश्यक वस्तूंचे नुकतेच वाटप करण्यात आले.
मालेगाव शहरात करोनाचा अतिशय मोठा फटका बसला आहे. या पार्श्वभूमीवर वंचित घटकांचे मोठ्या प्रमाणावर हाल होत आहेत. या घटकांसाठी मदत करण्याच्या उपजिल्हाधिकाऱ्यांच्या आवाहनास प्रतिसाद देत 'सीवायडीए'ने मालेगावमधील ५०० कुटुंबांना आठवडाभर पुरेल इतका शिधा दिला. तसेच नाशिक शहरातही या संस्थेतर्फे सुमारे ४०० कुटुंबांना मदत करण्यात आली. यामध्ये वडाळा, फुलेनगर, पाथर्डी, अमरधाम, बिडीकामगार नगर या झोपडपट्टी परिसरातील गरजू कुटुंबांना मदत करण्यात आली. संस्थेने आतापर्यंत राज्यभरातील विविध शहरांमध्ये लॉकडाउनच्या काळात सुमारे ५० हजार नागरिकांना मदत देण्यात आल्याची माहिती संस्थेचे समन्वयक मंगेश निकम यांनी दिली.
मजुरांनाही हात
नाशिकमधून परराज्यामध्ये पायी जाणाऱ्या सुमारे अकराशे मजुरांनाही जीवनरथ उपक्रमांतर्गत जीवनावाश्यक वस्तूंसह प्रवासात उपयोगी पडणाऱ्या वस्तूंचे वाटप करण्यात आले. संस्थेचे सचिव मॅथ्यू मट्टम, संचालक प्रवीण जाधव, मंगेश निकम, अतुल लभडे, विजय पवार आदी कार्यकर्ते या सेवाकार्यात योगदान देत आहेत.