म. टा. खास प्रतिनिधी, नाशिक
वाहतूक नियमांचे उलंघन करणाऱ्या वाहनचालकांना आता ऐनवेळी पैसे नाहीत, क्रेडिट-डेबिट कार्ड नाही अशा प्रकारच्या कोणत्याही सबबी सांगता येणार नाहीत. वाहतूक पोलिसांच्या मदतीसाठी महाराष्ट्र ट्रॅफिक अॅप मोबाइलवर उपलब्ध असून, पोलिसांनी कारवाई केलेल्या वाहनचालकाला काही काळानंतर आपल्या सोयीनुसार दंड भरण्याची सुविधा या अॅपमध्ये आहे. नियमित वाहतूक करणाऱ्या सर्व वाहनचालकांनी आपल्या मोबाइलवर हे अॅप डाऊनलोड करून घ्यावे, असे आवाहन जिल्हा पोलिस अधीक्षक डॉ. आरतीसिंह यांनी केले आहे.
वन स्टेट, वन ई-चलन हा नवीन उपक्रम राज्य सरकारने अंमलात आणला आहे. त्यानुसार, मुंबई शहरासाठी मुम ट्रॅफिक अॅप आणि उर्वरित महाराष्ट्र ट्रफिक अॅप असे दोन अॅप असून, गरजेनुसार वाहनचालकांनी ते अॅप डाउनलोड करायचे आहे. एखाद्या वाहनचालकावर परजिल्ह्यात दंडाची कारवाई झाल्यास हा दंड रोख तसेच डेबिट, क्रेडिट कार्ड किंवा ऑनलाइन भरता येईल. यापैकी एकही सुविधा वापरता आली नाही तर दंडाची रक्कम काही दिवस पेंडिंग ठेवून आपापल्या शहरात गेल्यानतर स्थानिक पोलिसांकडे दंडाची रक्कम भरता येईल. रक्कम भरली तर संबंधित वाहनचालकाला मोबाइलवर त्याबाबतचा मॅसेजही येणार आहे. मात्र, काही वाहनचालक हेतूपुरस्कर दंड भरण्यात टाळाटाळ करतात. त्यांना अनेक वेळा दंड झाला आहे. असे लक्षात आल्यास पोलिसांना ते वाहन तसेच चालकाचे कागदपत्र आणि वाहनचालविण्याचा परवाना जप्त करून दंड वसूली करता येईल यातूनही वाहनचालक सुटला तर वाहन नुतनीकरणाच्या वेळी संबंधित चालकाविरुद्ध किती वेळा किती दंड झाला आहे, याची माहिती 'आरटीओ'कडे असेल. यावेळी दंड भरल्याशिवाय वाहन नुतनीकरण होणार नाही, अशीही सोय या अॅपमध्ये आहे.