म. टा. वृत्तसेवा, सातपूर
शहरासह राज्यात शासकीय व खासगी रुग्णालयांत डॉक्टरांवर होणाऱ्या हल्ल्यांच्या निषेधार्थ निवासी डॉक्टरांनी संपाचे हत्यार उपसले आहे. या स्थितीतही सातपूरच्या कामगार विमा योजना रुग्णालयातील (ईएसआयसी) डॉक्टरांनी काळ्याफिती लावून कामगारांना रुग्णसेवा देणे सुरूच ठेवले आहे. दोन दिवसांत तब्बल पाचशेहून अधिक कामगार रुग्णांवर उपचार केले गेले असल्याचे ‘ईएसआयसी’च्या प्रशासन अधीक्षक सरोज जवादे यांनी ‘मटा’ला सांगितले. काही कामगार रुग्ण कामगार रुग्णालयात उपचार दिले जात आहेत का, अशी माहिती घेण्यासाठी आले असता, कामगारांनी कुठल्याही भूलथापांना बळी न पडता उपचारांसाठी बिनदिक्कतपणे यावे, असे आवाहनही त्यांनी केले.
वाढत्या लोकसंख्येत शासकीय रुग्णालांची संख्या कमी असल्याने रोजच रुग्णांची मोठी गर्दी होत असते. त्यातच निवासी डॉक्टरांनादेखील अतिरिक्त रुग्णांची सेवा देताना अधिक भारही सहन करावा लागतो. त्यामुळे साहजिकच एखाद्या वेळी रुग्णाला वेळेवर उपचार दिले गेले नसल्याने त्यांच्या नातेवाइकांचा रोष डॉक्टरांना सहन करावा लागतो. असाच काहीसा प्रकार राज्यातील शासकीय रुग्णालयांमध्ये होत असल्याने निवासी डॉक्टरांनी अचानकपणे संपाचे हत्यार उपसले आहे. एकीकडे राज्यात शासकीय रुग्णालयांत निवासी डॉक्टरांनी संप पुकारला असताना दुसरीकडे सातपूरच्या कामगार विमा योजना रुग्णालयात मात्र निवासी डॉक्टरांनी काळ्याफिती लावत कामगार रुग्णांवर वेळेवर उपचार सुरूच ठेवले आहेत. दोन दिवसांत तब्बल पाचशेहून अधिक कामगार रुग्णांनी ‘ईएसआयसी’ रुग्णालयाचा लाभ घेतला आहे. यात अनेक रुग्णांना अॅडमिटदेखील करून घेण्यात आले आहे. त्यामुळे कामगारांनी उपचारासाठी भटकण्याची वेळ मात्र आलेली नसल्याने कामगारांनी समाधान व्यक्त केले आहे. अनेक कामगार निवासी डॉक्टरांनी संप पुकारला असल्याने कामगार रुग्णालयात उपचार सुरू आहेत किंवा नाहीत याची माहिती घेण्यासाठी येत असल्याचे वैद्यकीय अधीक्षक जवादे यांनी सांगितले.
कामगाराने धन्यवादपर पत्र
राज्यात शासकीय रुग्णालयांमध्ये निवासी डॉक्टरांनी संप सुरू केला आहे. परंतु, सातपूर कामगार विमा रुग्णालयात कामगार रुग्णांना वेळेवर उपचार दिले जात असल्याने एका कामगाराने चक्क धन्यवादाचे पत्रच डॉक्टरांना लिहिले आहे. ‘ईएआयसी’मधील रुग्णसेवा सुरळीत असून, तेथील डॉक्टर व कर्मचारी कामगारांची वेळेवर सेवा करीत असल्याचे पत्रात म्हटले अाहे.
डॉक्टरांवर हल्ले होणे ही अगदी चुकीची बाब आहे. त्याचा ‘ईएसआयसी’तील सर्वच डॉक्टर व कर्मचाऱ्यांनी निषेध केला आहे. परंतु, कामगारांना वेळेवर उपचार मिळावेत यासाठी काळ्याफिती लावून रुग्णसेवा केली जात आहे.
-डॉ. सरोज जवादे, वैद्यकीय अधीक्षक, ईएसआयसी, सातपूर