म. टा. खास प्रतिनिधी, नाशिक
वैद्यकीय शास्त्राचे उच्च शिक्षण घेणाऱ्या डॉ. पायल तडवी यांना आत्महत्येस प्रवृत्त करणाऱ्यांवर कठोर कारवाई करावी, अशी मागणी राष्ट्रीय आदिवासी एकता परिषद आणि राष्ट्रीय रिपब्लीकन पक्षाने केली आहे.
मुंबई येथे वैद्यकीय शास्त्राचे उच्च शिक्षण घेणाऱ्या डॉ. पायल तडवी यांचा जातीच्या नावावर छळ केला जात होता. रुग्णांसमोर अपमानित करणे, प्रॅक्टीस करू न देणे यांसारख्या प्रकारांद्वारे त्यांचे मानसिक खच्चीकरण सुरू होते. रॅगिंगच्या नावाखाली तिचा छळ सुरू होता. या सर्व प्रकाराची माहिती प्रशासनास देऊन तिच्या तक्रारीची गंभीर दखल घेतली गेली नाही. या छळाला कंटाळूनच पायल यांनी आत्महत्या केली असून, तिला आत्महत्येस प्रवृत्त करणाऱ्यांवर अॅट्रॉसिटीसह सदोष मनुष्यवधाचा गुन्हा दाखल करावा तसेच तिच्या कुटुबीयांना एक करोड रुपये सानुग्रह अनुदान द्यावे, अशी मागणी राष्ट्रीय आदिवासी एकता परिषदेच्या पदाधिकाऱ्यांनी केली आहे. राष्ट्रीय रिपब्लीकन पक्षानेही जिल्हाधिकाऱ्यांना निवेदन देऊन अशाच प्रकारच्या कारवाईची मागणी केली आहे. मागणी मान्य न झाल्यास तीव्र आंदोलन छेडण्याचा इशाराही दोन्ही संघटनांनी दिला आहे.