ड्रेनेज चोकअपची डोकेदुखी

सातपूरला चेंबरमध्ये दारूच्या बाटल्या; प्लास्टिक कचऱ्याने कर्मचारी हैराण

म. टा. वृत्तसेवा, सातपूर

कामगार वस्ती असलेल्या सातपूर भागात महापालिकेने सांडपाणी वाहून जाण्याकरीता ड्रेनेजची व्यवस्था उभारली आहे. परंतु, वाढलेल्या घरकुलांमुळे ड्रेनेज चोकअपची समस्या ही मोठी डोकेदुखी बनली आहे. त्यातच सांडपाणी वाहून जाणाऱ्या लाइनीत नको त्या वस्तू टाकल्या जात असल्याने ड्रेनेज सतत चोकअप होत असतात.

महापालिकेच्या सातपूर विभागीय कार्यालयाच्या पाठीमागे असलेल्या स्वारबाबा नगर व काळे नगरच्या मध्यभागी ड्रेनेजच्या चेंबरमध्ये दारूच्या शेकडो बॉटल कर्मचाऱ्यांना आढळून आल्या आहेत. सांडपाणी वाहून जाणाऱ्या ड्रेनेजमध्ये अशाप्रकारे घाण, कचरा टाकणे चुकीचे आहे. नेहमीच ड्रेनेजच्या समस्या सातपूर भागात वाढल्याने कर्मचारीही परेशान झाले आहेत. नागरिकांनीदेखील सांडपाण्याच्या ड्रेनेजमध्ये घाण, कचरा टाकू नये, असे आवाहन ड्रेनेज विभागाने केले आहे.

पहिल्याच जोरदार पावसात नाशिककरांची दैना केली होती. सांडपाण्याच्या लाइनीदेखील अनेक ठिकाणी ओव्हरफ्लो झाल्याने चेंबरमधून पाणी रस्त्यावर वाहत होते. वाढत्या लोकवस्तीत महापालिकेने ठिकठिकाणी सांडपाणी वाहून जाण्यासाठी ड्रेनेजची सुविधा उपलब्ध केली आहे. परंतु, अनेक भागात ड्रेनेजच्या वस्तू टाकल्या जात असल्याने ड्रेनेज चोकअपची समस्या वाढली आहे.