म. टा. प्रतिनिधी, नाशिक
रासबिहारी इंटरनॅशनल शाळेतील आयबीपीवायपी शिक्षणप्रणाली अंतर्गत असलेल्या प्रायमरी इयर प्रोग्राम (पीवायपी)चे विद्यार्थ्यांनी विविध विषयांचे सादरीकरण केले. पीवायपीचे पाचवीचे शेवटचे वर्ष असते. या अनुषंगाने पहिली ते पाचवीपर्यंत विद्यार्थ्यांनी शिकलेल्या पीवायपी शिक्षणाचे सादरीकरण करण्यात आले. तसेच या अनुषंगाने प्रदर्शनही भरविण्यात आले होते. युरो किड्स प्ले स्कूलच्या संचालिका सुचित्रा माने यांच्या हस्ते या प्रदर्शनाचे उदघाटन करण्यात आले.
विद्यार्थ्यांना स्वत:च्या संकल्पना, ज्ञान, कौशल्य आणि दृष्टिकोन यांचे संकलन व्हिज्युअल, विडंबनात्मक लेख आणि आयसीटी सादरीकरणाद्वारे प्रदर्शित करण्याची संधी मिळाली. या वर्षी विविध सामाजिक समस्यांवर आधारीत ‘हाऊ वुई ऑर्गनाइज अवरसेल्व्हज’ ही संकल्पना विद्यार्थ्यांनी घेतली होती. यात विद्यार्थ्यांनी कचरा व्यवस्थापन, वाहतूक, विपनण प्रणाली, चलन बंदी, आपत्ती व्यवस्थापन असे विषय निवडले होते. ते होण्याची कारणे आणि मानवी जीवनावर होणारा परिणाम तसेच ते आटोक्यात आणण्यासाठीचे उपाय याचे विश्लेषण विद्यार्थ्यांनी सर्वांसमोर सादर केले.
तसेच इंग्रजी, मराठी व हिंदी भाषेतील कविता, नाट्यछटा, एकांकिका आणि भाषणही सादर केले. यावेळी आयसीटीची आधुनिक तंत्रज्ञान कौशल्याच्या आधाराने गो अनिमेट, मुव्ही मेकर, प्रेझी, एडिटिंग म्युझिक व व्हिडिओ, कॉमिक मेकर टूल आदी वेब २.० व ३.० टूल्सचा वापर करुन मोबाइल अॅप्लिकेशनद्वारे पालकांसाठी प्रश्नमंजूषा तयार करण्यात आली. तसेच त्यांची स्पर्धाही घेण्यात आली.