म. टा. खास प्रतिनिधी, नाशिक
'पब्लिक बायसिकल शेअरिंग'ला नागरिकांचा चांगला प्रतिसाद मिळाल्यानंतर स्मार्ट सिटी कंपनीकडून आता इलेक्ट्रिकल सायकलीही ठेवल्या जाणार आहेत. बॅटरीवर चालणाऱ्या २५ सायकली हेक्सा हिरो कंपनीने आणल्या असून, त्याचे भाडे पॅडल सायकलींच्या तुलनेत २५ ते ३० टक्के अधिक राहणार असल्याची माहिती स्मार्ट सिटीचे सीईओ प्रकाश थविल यांनी दिली आहे.
सार्वजनिक वाहतुकीला चालना देण्यासह प्रदूषणमुक्त शहर संकल्पनेतून स्मार्ट सिटी अभियानांतर्गत पर्यावरणपूरक, आरोग्यास हितकारक आणि आर्थिकदृष्ट्या व्यवहार्य असा 'पब्लिक बायसिकल शेअरिंग' प्रकल्प पीपीपी तत्त्वावर सुरू करण्यात आला आहे. महापालिका आणि स्मार्ट सिटी कंपनीच्या संयुक्त विद्यमाने हेक्सी हिरो सायकलच्या मदतीने तो राबविण्यात येत असून, त्याला नागरिकांचा चांगला प्रतिसादही मिळत आहे. स्मार्ट सिटीअंतर्गत एरिया बेस्ड डेव्हलपमेंटअंतर्गत (क्षेत्रिय पायाभूत सुविधा) संपूर्ण शहरात १०० डॉकिंग स्टेशन तयार करून हिरो कंपनीच्या वतीने एक हजार सायकली उपलब्ध करून देण्यात आल्या आहेत. या सायकल शेअरिंग प्रकल्पामुळे पर्यावरणपूरक वाहतूक, पैशांची बचत, शरिरस्वास्थ्य सुधारण्यास मदत, प्रदूषण कमी, इंधनाची बचत होत असल्याने नागरिकांमध्ये त्या लोकप्रिय झाल्या आहेत. त्यामुळे स्मार्ट सिटी कंपनीने या स्मार्ट सायकल शेअरिंगचा अधिक विस्तार करण्यासह त्यात नाविन्य आणण्याचा निर्णय घेतला आहे. हिरो कंपनीने आता शहरात इलेक्ट्रिकल सायकली आणल्या आहेत. पहिल्या टप्प्यात प्रायोगिक तत्त्वावर २५ इलेक्ट्रिकल सायकली दाखल झाल्या आहेत.
निवडक ठिकाणी चाचपणी
या सायकलींची निवडक ठिकाणी चाचपणी केली जाणार आहे. नागरिकांच्या प्रतिसादानंतर टप्प्या-टप्पाने सायकलींची संख्या वाढवली जाणार आहे. या सायकलींमध्ये बॅटरीसह पॅडलवर चालविण्याचीही सुविधा आहे. त्यामुळे नागरिकांना दोन्ही प्रकारचा वापर करता येणार आहे. इलेक्ट्रिकल सायकली दाखल झाल्यास त्याचा अधिक प्रचार होणार असल्याचा दावा कंपनीच्या वतीने करण्यात आला आहे. लवकरच शहरातील रस्त्यांवर इलेक्ट्रिकल सायकली धावताना दिसणार आहे.
स्मार्ट सायकल शेअरिंग प्रकल्पाला नागरिकांचा चांगला प्रतिसाद मिळाला आहे. त्यामुळे या सायकलींसोबतच आता हेक्सा कंपनीने बॅटरीवर चालणाऱ्या सायकली रस्त्यावर आणण्याचा निर्णय घेतला असून त्याची चाचपणी सध्या सुरू आहे.
- प्रकाश थविल, सीईओ, स्मार्ट सिटी कंपनी, नाशिक