'त्या' विद्यार्थ्यांचे सुधारीत निकाल जाहीर

लखन सावंत, कॉलेज क्लब रिपोर्टर

सावित्रीबाई फुले पुणे विद्यापीठातर्फे नोव्हेंबर महिन्यात घेण्यात आलेल्या इंजिनीअरिंगच्या शेवटच्या वर्षातील प्रथमसत्र परीक्षेच्या निकाल नव्याने जाहीर करण्यात आले आहेत. परीक्षेला उपस्थित असतानाही गैरहजर असल्याचा उल्लेख करीत नापासचा निकाल गुणपत्रिकेवर आला होता. याप्रश्नाला 'महाराष्ट्र टाइम्स'ने सर्वप्रथम वाचा फोडली होती. त्याची दखल विद्यापीठाने घेतली आहे.

सावित्रीबाई फुले पुणे विद्यापीठातंर्गत झालेल्या इंजिनीअरिंग परीक्षेत काही विद्यार्थ्यांच्या निकालावर पेपरला हजर असतानाही गैरहजर असा उल्लेख आला होता. यामुळे या विद्यार्थ्यांचे निकालही 'फेल' लागले. हे सर्व विद्यार्थी शेवटच्या वर्षात शिक्षण घेत असल्याने या विद्यार्थ्यांना प्लेसमेंटला मुकावे लागते की काय? असा प्रश्न निर्माण झाला होता. याबाबत 'महाराष्ट्र टाइम्स' मध्ये 'पेपरला हजर, निकालावर मात्र गैरहजर' या मथळ्याखाली बातमी देण्यात आली. या बातमीची दखल घेत विद्यापीठाने या सर्व परीक्षार्थी विद्यार्थ्यांची माहिती कॉलेजेसकडून मागवून घेतली आणि दहा दिवसात या विद्यार्थ्यांचे सुधारित निकाल लावण्याचे आश्वासन दिले. याबाबतचे वृत्तही 'मटा'ने दिले होते.

प्लेसमेंटचा मार्ग मोकळा

'महाराष्ट्र टाइम्स'ने केलेल्या पाठपुराव्याला यश आले असून, विद्यापीठाने नुकतेच संबंधित विद्यार्थ्यांचे सुधारित निकाल कॉलेजेसकडे पाठवले आहेत. विद्यार्थ्यांना कॉलेजकडून सुधारित निकालाची प्रतही देण्यात येत आहे. या संदर्भात 'महाराष्ट्र टाइम्स'च्या प्रयत्नाला यश आले आहे. सुधारित निकाल करण्यात आल्याने आता शेवटच्या वर्षातील विद्यार्थ्यांच्या प्लेसमेंटचा मार्गही मोकळा झाला आहे.

महाराष्ट्र टाइम्सने निकालासंदर्भातील आमचा विषय लावून धरला आणि आम्हाला न्याय मिळाला. सुधारित निकाल आल्याने मला व माझ्या घरच्यांना खूप आनंद झाला आहे.
- राहुल पारख, विद्यार्थी

निकालावर हजर राहून गैरहजर असा उल्लेख आल्याने मला धक्काच बसला होता. मात्र, आता सुधारित निकालाची प्रत मिळाल्याने मी खूप खुश झाले. विद्यापीठाने यापुढे अशा चुका टाळाव्यात.
- विशाखा पवार, विद्यार्थिनी