म. टा. खास प्रतिनिधी, नाशिक
कर्मचारी भविष्यनिर्वाह निधी कार्यालयाने (ईपीएफ) आर्थिक वर्षात १०२५ कंपन्यांची चौकशी करून ३७ कोटी ६२ लाखांची वसुली केली आहे. त्याचप्रमाणे २३ कोटी ३३ लाख वसूल करण्यासाठी २६९ कंपन्यांची बँक खाती गोठविली असून, आठ कंपन्यांची मालमत्ताही जप्त केल्याची माहिती कर्मचारी भविष्यनिर्वाह निधी कार्यालायचे आयुक्त एम. एम. अशरफ यांनी पत्रकार परिषदेत दिली.
अशरफ यांनी सांगितले, की नाशिकसह अहमदनगर, धुळे, जळगाव व नंदुरबार या पाच जिल्ह्यांचा समावेश असलेल्या या कार्यालयाने वर्षभरात ही कारवाई केली आहे. त्यासाठी १६२६ कंपन्यावर ईपीएफ अॅक्टनुसार कारवाई करण्यात आली. त्यात १०२५ कंपन्यांची चौकशी करण्यात आली. कर्मचाऱ्यांचे 'पीएफ'चे पैसे न भरणे, पैसे उशिरा भरणे यामुळे ही कारवाई केली आहे. यात काही कंपन्यांकडून उशिरा पैसे भरले म्हणून व्याजही वसूल करण्यात आले आहे.
कर्मचारी भविष्यनिर्वाह निधी कार्यालायने गेल्या काही वर्षांत सर्वच काम डिजिटल केल्यामुळे त्याचा फायदा आता सर्वांना होऊ लागला आहे. त्यामुळे कार्यालयात होणारी गर्दीही घटली आहे. पेन्शनधारक डिजिलॉकर या अॅपमध्ये आता पेन्शन पेमेंट ऑर्डर डाऊनलोड करू शकणार आहेत. पेन्शन रोखीकरण योजनेतही अनेकांना फायदा होणार आहे. पीएफ कायद्यातील दुरुस्तीचे फायदेसुद्धा २५ हजार आस्थापनांना मिळणार आहेत. मृत कामगार एकापेक्षा जास्त आस्थापनांमध्ये काम करीत असेल, तर त्याच्या कुटुंबीयांना मिळणारी निर्धारित रक्कमही आता मिळणार आहे.
--
कारवाई झालेल्या दहा प्रमुख कंपन्या
--
कंपनी - थकबाकी (लाखांत) - वसुली
--
सुमित मशिनरी, अंबड - १६८.५९ - काहीच नाही
नाशिक डिस्ट्रिक्ट को-ऑप. सुपरवायजरी सोसायटी - ८७.११ - पूर्ण
नंदुरबार नगर परिषद - ६८.१६ - काही नाही
कृष्णा अॅटोकॅप, अंबड- ८५.१५ - २२ लाख ८७ हजार ३९८
नाशिक महापालिका - ४९.०० - पूर्ण
अनिल प्रिंटर्स, नाशिक- ४४.५६ - २ लाख ३० हजार ६०२
नाशिक ग्रामीण शिक्षक प्रसारक मंडळ - ४४.५६ - पूर्ण
प्रीमियम टूल्स प्रा. लि. सातपूर- ४२.६८ - काहीच नाही
भगूर नगर परिषद- ३८.१४ - काहीच नाही
नेऊमॅन सिस्टीम कन्सल्टंट- ३२.४१ - १३ लाख ६५ हजार १५५