म. टा. प्रतिनिधी, नाशिक
प्रखर देशभक्त स्वातंत्र्यवीर सावरकर यांच्या ५४ व्या आत्मार्पण दिनानिमित्त आयाम आणि उत्तुंग सांस्कृतिक परिवार ट्रस्ट या संस्थांच्या वतीने रविवारी (दि. २३) 'अनादी मी...अनंत मी' या नाटकाचे सादरीकरण केले जाणार आहे. गंगापूर रोडवरील शंकराचार्य न्यासमधील कुर्तकोटी सभागृहात सायंकाळी साडेसहा वाजता हा कार्यक्रम होईल.
सन १९८३ साली स्वा. सावरकरांच्या जन्मशताब्दी वर्षात मुंबईस्थित ज्येष्ठ नाट्यरंगकर्मी माधव खाडिलकर लिखित आणि दिग्दर्शित आणि सुविख्यात गायिका आशा खाडिलकर यांच्या संगीत दिग्दर्शनाचा साज असलेली 'अनादी मी, अनंत मी' ही नाट्यकलाकृती गेल्या साडेतीन दशकात महाराष्ट्रात व भारताबाहेरही साकार झाली आहे. या नाटकाचे व्यावसायिक स्वरूपात सुमारे दीडशेहून अधिक प्रयोग झाले आहेत. निवेदन, आरती, ओव्या, समूह गीते, स्वगते, पोवाडे, सावरकरांच्या आयुष्यातील विविध रोमांचकारी प्रसंग, त्यांच्या नाटकातील नाट्यप्रवेश अशा विविध पैलूंचे रंगमंचीय दर्शन घडविणारा नटलेला हा नाट्यप्रयोग खाडिलकर कुटुंबातील पुढील पिढीने पुनर्निर्मित केला आहे. नागरीकांनी या उपक्रमाचा लाभ घ्यावा, असे आवाहन आयामतर्फे मिलिंद कुलकर्णी व विश्वस्त मंडळाने केले आहे.