सातपूरला उत्साह
म. टा. वृत्तसेवा, सातपूर
सातपूर परिसरात शुक्रवारी विविध ठिकाणी योग दिन साजरा करण्यात आला. सरकारी व खासगी शाळांमध्येही योग दिनाला विद्यार्थ्यांना धडे देण्यात आले. त्र्यंबकेश्वर रोडवरील सौभाग्य लॉन्स येथे विविध सामाजिक संघटनांच्या वतीने योग दिनाचे आयोजन करण्यात आले होते. जेसीआय, उर्जेय योग केंद्र, सातपूर व अंबड डॉक्टर्स असोसिएशन, सौभाग्य महिला मंडळ यांचा सहभाग योग दिनाला लाभला. याप्रसंगी नगरसेविका माधूरी बोलकर, पल्लवी पाटील, सिमा निगळ यांसह परिसरातील महिला व पुरूषांनी योग दिनात योगाचे धडे घेतले.
महापालिकेच्या जिजामाता विद्यालयातही योग दिनानिमित्त विद्यार्थ्यांनी योगासने केली. योगाचार्य डॉ. चेतना देवरे, दीपक मानकर, डॉ. रमाकांत जाधव आदींनी विद्यार्थ्यांना योगाचे मार्गदर्शन केले. योगगुरू रामदेवबाबा यांच्या पंतजली योग विद्यापीठात शिकविले जाणारे विविध आसने विद्यार्थ्यांना शिक्षकांनी सांगितले. याप्रसंगी शाळेच्या मुख्याध्यापिका छाया गोसावी, मुख्य शिक्षक सुरेश खांडबहाले व शिक्षकांनी योगाचे धडे गिरविले.
विविध विकास संघटना संचलित छत्रपती शिवाजी विद्यालयातही योग दिन उत्साहात साजरा करण्यात आला. शेकडो विद्यार्थ्यांनी योग दिनात सहभाग नोंदविला. पतंजली विद्यापीठ सदस्य शांताराम जोशी, जगदीश जोशी, दिनकर खर्डे यांनी विद्यार्थ्यांना योगाचे धडे दिले. याप्रसंगी शाळेचे शिक्षक व संस्थेचे संचालक उपस्थित होते.