चार कंटेन्मेंट झोन वगळले
सावतानगर, उत्तमनगर सातपूर कॉलनी आणि मालपानी सॅफ्रोनचा समावेश
म. टा. प्रतिनिधी, नाशिक
शहरातील सावता नगर, सातपूर कॉलनी, मालपाणी सॅफ्रोन, उत्तमनगर ही चार ठिकाणे करोनाबाधित रुग्ण आढळल्याने कंटेन्मेंट झोन म्हणून नाशिक महानगरपालिकेच्या वतीने जाहीर करण्यात आली होती. मात्र, आता चौदा दिवस तपासणी करून या परिसरात एकही रुग्ण न आढळल्याने हे चारही भाग कंटेन्मेंट झोनमधून वगळण्यात आले आहेत.
महापालिका आयुक्त राधाकृष्ण गमे यांनी रविवारी याबाबतचे आदेश पारित केले आहेत. या दरम्यान चारही परिसराच्या सीमा सील करण्यात आल्या होत्या. या परिसरात कुणालाही प्रवेश करण्यास मनाई करण्यात आली होती. अत्यावश्यक सेवा वगळता सर्व व्यवहार ठप्प होते. याठिकाणी परिसरातील नागरिकांची घरोघरी जाऊन आरोग्य तपासणी केली असून, या परिसरातील प्रत्येक घरातील व्यक्तीची नोंद करण्यात येत होती. तपासणीनंतर गेल्या काही दिवसांत या परिसरात एकही करोनाबाधित रुग्ण न आढळल्याने हा परिसरात कंटेन्मेंट झोन मधून रद्द करण्यात आल्याची घोषणा आयुक्त गमे यांनी केली आहे.
आयुक्तांनी प्रसिद्ध केलेल्या पत्रकात म्हटले आहे करोनाचा प्रादुर्भाव वाढू नये म्हणून करण्यात आलेल्या प्रतिबंधात्मक कारवाईच्या पार्श्वभूमीवर नाशिक जिल्ह्यामध्ये आपत्ती व्यवस्थापन कायदा व साथरोग अधिनियम १८९७ नुसार नाशिक महापालिका क्षेत्रामध्ये कामकाज सुरू आहे. करोनाबाधित रुग्ण असलेल्या क्षेत्रातून नागरिकांची तपासणी करून त्यातील कुणी बाधित आहे किंवा नाही हे तपासले जाते त्या अनुषंगाने उत्तमनगर, सातपूर कॉलनी, सावतानगर, मालपाणी सफ्रोन या भागात अबाधित रुग्ण असल्याचे स्पष्ट झाले आहे. त्यामुळे रविवारपासून हा परिसर नागरिकांसाठी खुला करण्यात आला आहे. यामुळे या परिसरातील दुकाने शासनाच्या निर्देशानुसार दुपारी चार वाजेपर्यंत उघडे राहतील. या चार भागातील कंटेनमेंट झोनचे निर्बंध हटवल्याने या परिसरात विस्कळीत झालेले जनजीवन सुरळीत होण्यास मदत होणार आहे.