गवळवाडीतील शाळा करणार सुविधांयुक्त
महेश गाडेकर यांचे प्रतिपादन
म. टा. प्रतिनिधी, नाशिक
समाजातील प्रत्येक घटकाला सोबत घेऊन नवनवीन उपक्रमांच्या माध्यमातून समाज सेवा करण्यास रोटरी यापुढेही प्राधान्य देणार आहे. क्लबने दत्तक घेतलेल्या दिंडोरी तालुक्यातील गवळवाडी शाळेत आंतरराष्ट्रीय दर्जाच्या शैक्षणिक सुविधा उपलब्ध करून देत स्मार्ट शिक्षण देण्याचा प्रयत्न करण्यात येणार असल्याचे रोटरी क्लब ऑफ नाशिक, नॉर्थचे नवनिर्वाचित अध्यक्ष महेश गाडेकर यांनी सांगितले.
समाजसेवेसाठी कार्यरत असलेल्या रोटरी क्लब ऑफ नाशिक नॉर्थचा वर्ष २०१९-२० वर्षासाठी असलेल्या नवनिर्वाचित कार्यकारिणीचा पदग्रहण सोहळा हॉटेल व्हेज अरोमा येथे पार पडला. प्रमुख पाहुणे महेश मोकाळकर यांच्या हस्ते नूतन पदाधिकाऱ्यांना रोटरीचे पदचिन्ह देऊन सन्मानित करण्यात आले. यावेळी अध्यक्षपदी महेश गाडेकर, सचिवपदासाठी उमेश राठोड, सहसचिवपदी राजेश सिंघल, प्रशांत सारडा, खजिनदारपदी गीता पिंगळे, निरीक्षण अधिकारी पदी सुशांत जाधव, योगराज राजपूत, नियोजन अधिकारी पदी राजेंद्र धारणकर, इतर समित्यांची जबाबदारीसाठी जयंत भिंगे, नाना शेवाळे, प्रशांत हाटेकर, अशोक सोनवणे, परेश महाजन, किरण सरोगे यांनी शपथ घेतली.
अध्यक्ष गाडेकर पुढे म्हणाले, दिव्यांग व्यक्तींसाठी झेप उपक्रमांतर्गत पूर्ण मोटराईज्ड हात उपलब्ध करुन देण्यात येणार आहे. ग्रामीण भागातील शिक्षणाचे महत्त्व, निसर्ग संवर्धन, दिव्यांगांसाठी क्रीडा स्पर्धा, टॅलेंट हंट आर्थिक मदतीसोबत रोजगार उपलब्ध करवून देणे, महिला आरोग्य तपासणी, सक्षमीकरण, स्वच्छ भारत अभियान, रक्तदान शिबिर, बॉक्स क्रिकेट, समाजसेवेकरिता उभारल्या जाणाऱ्या निधीसाठी 'गरबा'चे आयोजन केले जाणार आहे. या वर्षात राबविण्यात येणाऱ्या विविध समाजपोयोगी उपक्रमाचे माहिती आणि त्याचे सादरीकरण केले. सूत्रसंचालन डॉ. आवेश पलोड आणि अश्विनी जोशी तर उमेश राठोड यांनी आभार मानले.