केरळपूरग्रस्तांना मदतीसाठी जिल्हा प्रशासन सरसावले असून, महसूलमधील तब्बल १६०० हून अधिक अधिकारी, कर्मचाऱ्यांनी आपले एक दिवसाचे वेतन देत दातृत्वाचे दर्शन घडविले आहे. प्रांताधिकारी आणि तहसील कार्यालयांतर्गत येणाऱ्या अधिकारी, कर्मचाऱ्यांसह जिल्हाभरातील तलाठ्यांनीही एक दिवसाचे वेतन देऊन या मदतकार्यात खारीचा वाटा उचलला आहे.
महापुरासारख्या नैसर्गिक आपत्तीमुळे केरळमधील लाखो कुटुंब उध्वस्त झाली आहेत. या पुरामुळे मोठ्या प्रमाणावर जीवित आणि वित्तहानी झाली असून, जगभरातून मोठ्या प्रमाणावर मदतीचा ओघ सुरू झाला आहे. जिल्हाधिकाऱ्यांनी देखील महसूलमधील अधिकारी, कर्मचाऱ्यांना मदतीचे आवाहन केले होते. त्यास सकारात्मक प्रतिसाद देत त्यांनी एक दिवसाचे वेतन देऊ केले आहे. केरळ मुख्यमंत्री आपत्ती निवारण निधी नावाने स्टेट बँक ऑफ इंडियामध्ये खाते उघडण्यात आले असून, ६७३१९९४८२३२ या बँक खात्यावर नागरिकांनी यथाशक्ती मदत पाठवावी, असे आवाहन निवासी उपजिल्हाधिकारी रामदास खेडकर यांनी केले आहे. तिरुअनंतपुरम येथील शहर शाखेमध्ये हे बँक खाते असून, त्याचा आयएफसी कोड SBIN0070028 असा आहे. मालेगाव मर्चंट कोऑपरेटिव्ह बँकेने एक लाखांची, तर मालेगाव मर्चंट जनकल्याण ट्रस्टने २५ हजार रूपयांची मदत केली आहे. नाशिक जिल्हा ओनियन मॅन्युफॅक्चरर्स असोसिएशनने केरळसाठी २० टन कांदा पाठविला आहे.