मुलीच्या लग्नानंतर शेतकऱ्याची आत्महत्या

म. टा. वृत्तसेवा, मनमाड

मुलीचे बुधवारी वेहेळगाव (ता. नांदगाव) येथे लग्न लावून अवघे चोवीस तास उलटत नाही तोच वधुपिता शेतकऱ्याने गुरुवारी सकाळी गळफास घेऊन आत्महत्या केल्याने परिसरात खळबळ उडाली आहे. बीड जिल्ह्यातील पारेगाव येथील राजेंद्र बाबूराव खेडकर असे आत्महत्या केलेल्या या शेतकऱ्याचे नाव असून, त्याने शेती विकून मुलीचे लग्न लावल्याचे सांगितले जात आहे. मात्र, ही व्यक्ती मनोरुग्ण असल्याचे कुटुंबीयांनी सांगितल्याचे पोलिस सूत्रांचे म्हणणे आहे. त्यांच्यामागे पत्नी, मुलगा असा परिवार आहे.

दुसरी घटना निफाड तालुक्यातील पिंपरी (रौळस) येथे घडली असून, सागर गंगाधर शंखपाळ (वय १९) याने गळफास घेऊन आत्महत्या केली. त्याच्या वडिलांच्या नावावर शेती असून, चार लाख रुपये सोसायटीचे कर्ज आहे. गंगाधर शंखपाळ यांचा तो एकुलता मुलगा होता.