पन्नास कॉलेजेसकडून ऑनलाइन रजिस्ट्रेशन

अकरावीची प्रवेशप्रक्रिया सुरू; सेल्फ फायनान्सने १,५६० जागा वाढल्या

म. टा. प्रतिनिधी , नाशिक

पुणे अन् मुंबईच्या धर्तीवर यंदा पहिल्यांदाच नाशिकमध्ये इयत्ता अकरावीच्या ऑनलाइन प्रवेशांसाठी प्रशासनाची तत्परतेने तयारी सुरू आहे. यंदा स्वयं अर्थसहाय्यित संस्थांच्या प्र्रस्तावामुळे शहरात गतवेळच्या तुलनेत १,५६० जागांमध्ये वाढ झाली आहे. तर, ऑनलाइन प्रक्रियेसाठी नोंदणी करण्याच्या अखेरच्या दिवशी मंगळवार (दि. १८) दुपारपर्यंत सुमारे ५० कॉलेजांनी नोंदणी केली होती. उर्वरित दोन कॉलेजेसची प्रक्रिया सुरू होती.

शहरात महापालिका हद्दीमध्ये अकरावी प्रवेशांसाठी यंदा ५२ कॉलेजेस उपलब्ध आहेत. पैकी सोमवारपर्यंत ५२ पैकी ४२ कॉलेजेसने रजिस्ट्रेशन केले होते. काही कॉलेजेसना तांत्रिक चुकांच्या दुरूस्तीसाठी मंगळवारची मुदत देण्यात आली होती. मंगळवारी दुपारपर्यंत हे काम अंतिम टप्प्यात आले होते.

इयत्ता दहावीचा निकाल जाहीर झाल्यानंतर विद्यार्थ्यांना ऑनलाइन अर्ज उपलब्ध करून दिले जाणार आहेत. यानंतरच्या टप्प्यात १५ जून ते १५ जुलै या ३० दिवसांच्या कालावधीत प्रवेशाच्या चार फेऱ्या घेण्यात येऊन प्रवेश पूर्ण होतील. यंदा ऑनलाइन केंद्रीय पद्धतीने २१ हजार ५६० जागांसाठी प्रवेश देण्यात येणार आहे. ही प्रक्रीया पहिल्यांदाच शहरात राबविली जात असल्याने माहितीसाठी विद्यार्थ्यांना माहिती देण्यासाठी माहिती पुस्तिकाही शिक्षण विभाग पोहचविणार आहे.

पारदर्शी प्रवेशांची अपेक्षा

गत वेळेसपर्यंत शहरातील काही रँकींगच्या कॉलेजेसमध्ये प्रवेशासाठी विद्यार्थ्यांची झुंबड उडते. विज्ञान शाखेसाठी काही कॉलेजेसचे मेरिट तीन प्रवेश फेऱ्यांनंतरही ९० टक्कयांच्या खाली येत नाही. तर काही ठिकाणी कॉलेजेसला विद्यार्थी शोधावे लागतात. यामुळे पालक व विद्यार्थ्यांच्या वाट्याला मनस्ताप येतो. यंदा मात्र ऑनलाइन प्रक्रिया या गोंधळावर उतारा ठरून केंद्रीभूत पद्धतीने पारदर्शक प्रवेश होतील, असा आशावाद विद्यार्थी व पालकांनी व्यक्त केला आहे.

अकरावी ऑनलाइन प्रक्रियेसाठी महापालिका हद्दीत एकूण ५२ कॉलेजेस समाविष्ट आहेत. जवळपास सर्व कॉलेजेसचे रजिस्ट्रेशन पूर्ण झाले असून, स्वयं अर्थसहाय्यतेच्या काही प्रस्तावांमुळे १५६० जागा वाढताहेत. ही सर्व प्रक्रिया सुरळीत पार पडेल, असा विश्वास वाटतो.

- रामचंद्र जाधव,
शिक्षण उपसंचालक, शिक्षण विभाग