म. टा. वृत्तसेवा, नाशिकरोड
देवळाली येथील दोन सदनिका (फ्लॅट) मालकी नसताना विक्री करून फसवणूक केल्याप्रकरणी उपनगर पोलिस ठाण्यात गुन्हा दाखल करण्यात आला आहे. वैशाली शरद डोंगरे उर्फ तन्वी सुजित गिरकर (वय ४४, परेल, मुंबई) यांनी या प्रकरणी फिर्याद दिली आहे.
वैशाली डोंगरे यांची देवळाली हद्दीत सर्व्हे नं. २०/ए/२/२/३ ही वडिलोपार्जित जमीन आहे. डोंगरे यांची आई कालिंदी यांनी बिल्डर सतीश लढ्ढा यांच्याशी करारनामा करून जमीन विकासासाठी दिली. या जागेत २००० मध्ये 'ग्रीन सॅडो' नावाचे अपार्टमेट उभारून लढ्ढा यांनी फ्लॅट क्रमांक २ हा ३० सप्टेंबर २००० रोजी वैशाली डोंगरे व त्यांची बहीण मीनल डोंगरे यांच्या नावे करून दिला. या फ्लॅटला कुलूप लावून वैशाली मुंबईत राहण्यास गेल्या. अधूनमधून त्या फ्लॅटची पाहणी करीत होत्या. २०१६ मध्ये त्यांना त्यांच्या काकांनी सांगितले, की तुमच्या फ्लॅटमध्ये गिते नावाची व्यक्ती राहत आहे. नोकरीमुळे वैशाली नाशिकला तातडीने येऊ शकल्या नाहीत. एक मार्च २०१८ रोजी बहीण मीनलसह त्या फ्लॅटवर गेल्या. तेथे गिते नावाची व्यक्ती राहत होती. त्याने या दोन्ही बहिणींना शिवीगाळ करून दरवाजा बंद केला. चौकशीअंती समजले, की हा फ्लॅट शरद गिते याने आवटे नावाच्या व्यक्तीला चार-पाच वर्षांपासून भाड्याने दिला आहे. या प्रकरणी वैशाली यांनी उपनगर पोलिसांकडे तक्रार केली. त्यानंतर महापालिका कार्यालयाने त्यांना तुमचा फ्लॅट विक्रीस निघाला असल्याचे सांगून बोलावले. वैशाली महापालिकेच्या नाशिकरोड कार्यालयात गेल्या, तेव्हा शरद जगन्नाथ गिते, माधव गिते, मनीषा गिते, शरदचे सासरे सुनील नागरे, बबाई गिते यांनी फ्लॅटची खोटी कागदपत्रे बनवून ती महापालिका कार्यालयात दिल्याचे समजले. वैशाली यांनी फ्लॅट आपल्याच नावावर असल्याचे कायदेशीर पुरावे सादर केले. उपनिबंधक कार्यालयात वैशाली यांनी फ्लॅटशी संबंधित कागदपत्रांसाठी अर्ज केल्यावर शरद गिते व माधव गिते यांनी वैशाली यांचा फ्लॅट क्रमांक २ आणि ५ बिल्डर असल्याचे भासवून विकल्याचे उघड केले. त्यासाठी मनीषा गिते व बबाई गिते यांना साक्षीदार केले होते. पोलिसांनी तक्रारीवरून फसवणुकीचा गुन्हा दाखल केला आहे.