मद्यपींची तपासणी थेट सिव्हिलमध्येच
म. टा. खास प्रतिनिधी, नाशिक
मद्यपी वाहनचालकांना शोधण्यासाठी वापरण्यात येणारे ब्रेथ अॅनालायझरवर फुली मारण्याचे निर्देश वाहतूक पोलिसांना मिळाले आहेत. करोनाचा संसर्ग रोखण्यासाठी हा निर्णय घेण्यात आला असून, यापुढे वाहतूक पोलिसांना मद्यपी वाहनचालकाची तपासणी करण्यासाठी संशयित वाहनचालकांना सिव्हिल हॉस्पिटलमध्ये न्यावे लागणार आहे.
सध्या राज्यात करोना व्हायरसचा झपाट्याने प्रसार होत असून, करोनाची लागण झालेल्या पेशंटची संख्या वाढते आहे. या पार्श्वभूमीवर महाराष्ट्र पोलिसांनी ब्रेथ अॅनालायझरचा वापर न करण्याचा निर्णय घेतला आहे. याबाबतचे पत्र राज्यातील सर्वच युनिट्सला देण्यात आले आहे. त्यात करोनाचा संसर्ग वाढू नये यासाठी मद्यपी वाहनचालकांची तपासणी ब्रेथ अॅनालायझर न वापरण्याचे आदेश देण्यात आले आहेत. नाशिक शहर पोलिसांकडे ६० अॅनालायझर असून, त्याचा वापर वाहतूक शाखेमार्फत करण्यात येतो. आधुनिक तंत्रज्ञान असलेल्या अॅनालायझरमध्ये संशयित मद्यपी वाहनचालकाने फुंकर मारताच त्याने सेवन केलेल्या मद्याचे प्रमाण समोर येते.
सध्या राज्यात करोनाचा प्रसार होत असून, तो रोखण्याच्यादृष्टीने अॅनालायझरचा वापर बंद ठेवण्याचा निर्णय झाला आहे. करोनाचा संसर्ग कमी झाल्यानंतर पुन्हा अॅनालायझर वापरात येतील, असे वाहतूक शाखेच्या अधिकाऱ्यांनी स्पष्ट केले. अॅनालायझरचा वापर बंद झाल्याने वाहनचालकाबरोबर वाहतूक पोलिसांचे आरोग्य हित जोपासले जाईल.
कारवाई मात्र होणारच
अॅनालायझरचा वापर बंद झाल्याने वाहतूक शाखेला पुन्हा पूर्वीच्या पद्धतीने मद्यपी वाहनचालकांवर कारवाई करावी लागणार आहे. याबाबत सूत्रांनी सांगितले की, अॅनालायझरचा वापर होणार नसला तरी मद्यपी वाहनचालकांवरील कारवाई सुरूच राहणार आहे. संशयित वाहनचालक सापडल्यानंतर त्याची सिव्हिल हॉस्पिटलमध्ये तपासणी करून वाहनचालकास थेट कोर्टात हजर करण्यात येईल. अॅनालायझर वापरामुळे सिव्हिलमधील तपासणीचा वेळ वाचत होता. आता तो पुन्हा वाढेल. मात्र, करोनाबरोबर लढताना ही बाब गौण असल्याचे वाहतूक पोलिस अधिकाऱ्याने स्पष्ट केले.