म. टा. वृत्तसेवा, मनमाड
ज्येष्ठ समीक्षक, माजी प्राचार्य व इंग्रजीचे प्राध्यापक डॉ. प्रभाकर बागले यांनी आपल्या अध्यापनातून विद्यार्थ्यांसाठी पाठ्यपुस्तकांबाहेरचे जग खुले केले. जगण्याकडे सकारात्मकपणे बघण्याची दृष्टी तसेच आत्मभान दिले. शिस्तबद्धता आणि प्रभावी अध्यापन तसेच अभ्यासपूर्ण लिखाण ही डॉ. बागले यांची वैशिष्ट्ये होती, असा सूर गुरुवारी मनमाड येथे माजी विद्यार्थ्यांनी आयोजित केलेल्या डॉ. बागले कृतज्ञता सोहळ्यात व्यक्त झाला.
मराठी राजभाषा दिनी येथील केआरटी विद्यालयात आयोजित करण्यात आलेल्या सोहळ्यात इंग्रजीचे प्राध्यापक डॉ. बागले यांचे वेगळेपण सर्व वक्त्यांनी अधोरेखित केले. कार्यक्रमाच्या अध्यक्षस्थानी मनमाड महाविद्यालयाचे प्राचार्य डॉ. बी. एस. जगदाळे होते. त्यांच्यासह 'केआरटी'चे प्राचार्य मुकेश मिसर, प्रा. शिवाजी सोनवणे आदी व्यासपीठावर उपस्थित होते. प्राचार्य डॉ. जगदाळे म्हणाले, एकेकाळच्या आपल्या शिक्षकाचा सत्कार माजी विद्यार्थ्यांनी केला. आजच्या शिक्षकांनी यातून बोध घेऊन पुढची पिढी आपला सत्कार, सन्मान करीन असे कार्य केले पाहिजे. डॉ. बागले यांच्या कार्याचाही त्यांनी गौरव केला.
सत्काराला उत्तर देताना डॉ. बागले म्हणाले, स्वतःची वेगळी ओळख निर्माण करा. आपले आत्मभान जागरूक ठेवा. आज मन भयमुक्त आहे का? खरंच ज्ञानमुक्त विकसित होत आहे का? असे प्रश्न निर्माण होत आहेत. आपण सर्व दडपणाखाली काम करतोय. दडपणामुळे सर्जकता कमी होत असल्याची भीती त्यांनी व्यक्त केली. डॉ. बागले यांनी केवळ पुस्तक शिकवले नाही तर जीवन शिकवले, विद्यार्थ्यांची समृद्ध पिढी घडवली असे मत मुकेश मिसर यांनी मांडले.