तरुणीसह दोन जणांचा शोध
म. टा. प्रतिनिधी, नाशिक
एस्पायर फायनान्स कंपनीतील क्लस्टर मॅनेजरसह तरुण-तरुणीने अनेक कर्जदारांचे १६ लाख ९० हजाराचे हप्ते वसूल करून ते कंपनीला न भरता फसवणूक केल्याची घटना उघडकीस आली आहे. याबाबत सरकारवाडा पोलिस ठाण्यात तिघांविरुद्ध गुन्हा दाखल करण्यात आला असून, यातील मुख्य संशयिताला अटक करण्यात आली आहे.
फुलेश विश्‍वनाथ बोडके (वय ४३, रा. १६, श्रीलक्ष्मी पार्क, जॉगिंग ट्रॅकजवळ, इंदिरानगर, नाशिक) असे अटक केलेल्या संशयित क्लस्टर मॅनेजरचे नाव आहे. तसेच संशयित राहुल जगताप व चेतना गिरी या दोघा तरुण-तरुणीचा सरकारवाडा पोलिस शोध घेत आहेत. पोलिसांनी दिलेल्या माहितीनुसार, सुरेश बोडके हा एस्पायर फायनान्स कंपनीत क्लस्टर मॅनेजर म्हणून काम पाहत होता. त्याने आपले सहकारी राहुल जगताप व चेतना गिरी यांच्या मदतीने एस्पायर कंपनीकडून कर्ज घेतलेल्या कर्जदारांचे दरमहा कर्जाचे हप्ते वसूल केले. सध्या चार कर्जदारांची १६ लाख ९० हजार २४० रुपयांची रक्कम अर्थात हप्ते वसूल केल्यावर संशयितांनी ते एस्पायर फायनान्स कंपनीला न भरता परस्पर स्वत:च या पैशांचा वापर केला. सुरेश बोडके, राहुल जगताप व चेतना गिरी यांनी कर्जदारांचे जवळपास १६ लाख ९० हजार रुपये हप्त्याच्या स्वरूपात जमा केले; परंतु ते कंपनीला न भरता कर्जदारांसह कंपनीची फसवणूक केली. दरम्यान, संशयितांनी कर्जदारांकडून ईएमआय वसूल करताना त्यांना पैसे मिळाल्याची अथवा हप्ता भरल्याची कोणतीही पावती दिली नाही. तसेच कर्जदारांच्या खात्यातही हप्ता भरल्याबद्दल काही नोंद झाली नाही. त्यामुळे कर्जदारांना व कंपनीला संशय आला. त्यांनी याबाबत माहिती घेतली असता क्लस्टर मॅनेजर सुरेश बोडके व त्याच्या इतर दोघा साथीदारांनी लोकांचे हप्ते कंपनीला भरलेच नसल्याचे निष्पन्न झाले.
चार जणांची फसवणूक
या घटनेत एस्पायर फायनान्ससह सध्या चार तक्रारदारांची फसवणूक झाली आहे. याबाबत नदिम रियाज शेख (रा. शिवाजीनगर, जेलरोड, नाशिकरोड) यांनी फिर्याद दाखल केली आहे. त्यानुसार सरकारवाडा पोलिसांनी घटनेतील मुख्य संशयित असलेल्या क्लस्टर मॅनेजर सुरेश बोडके याला अटक केली आहे, तर पसार असलेल्या राहुल जगताप व चेतना गिरी यांचा शोध सुरू केला आहे. या गुन्ह्याचा पुढील तपास पोलिस उपनिरीक्षक बागूल करीत आहेत.