एसएसबी मुलाखतीसाठी विनामूल्य प्रशिक्षण
म. टा. वृत्तसेवा नाशिकरोड
महाराष्ट्रातील युवक व युवतींना सशस्त्र सैन्यदलाकडून सर्व्हिसेस सिलेक्शन बोर्ड (एसएसबी) परीक्षेची मुलाखत पत्रे मिळण्याची खात्री असलेल्या उमेदवारांसाठी सर्व्हिसेस सिलेक्शन बोर्ड मुलाखतीच्या पूर्वतयारी करण्यासाठी छात्रपूर्व प्रशिक्षण केंद्र, नाशिक रोड, नाशिक येथे १८ ते २७ सप्टेंबर या दहा दिवसांच्या कालावधीत विनामूल्य प्रशिक्षण वर्गाचे आयोजन करण्यात आल्याची माहिती प्रभारी अधिकारी रामदास खेडकर यांनी दिली आहे.
इच्छुक व पात्र उमेदवारांनी या प्रशिक्षण वर्गात प्रवेश घेण्यासाठी १६ सप्टेंबर सकाळी साडे दहा वाजता नाशिकरोड येथील छात्रपूर्व प्रशिक्षण केंद्र शैक्षणिक प्रमाणपत्र व गुणपत्रिकेच्या मुळ प्रतींसह मुलाखतीस हजर रहाण्याचे आवाहनही या कार्यालयातर्फे करण्यात आले आहे. एसएसबी प्रवेशासाठी कम्बाईंड डिफेन्स सर्व्हिसेस एक्झामिनेशन (यूपीएससी) अथवा नॅशनल डिफेंस अॅकॅडमी एक्झामिनेशन पास झालेली असावी व त्यासाठी सर्व्हिसेस सिलेक्शन बोर्डसाठी पात्र असणे आवश्यक आहे, एनसीसी (सी) सर्टिफिकेट अे/बी ग्रेडमध्ये पास झालेले असावे व एनसीसी ग्रुप हेडक्वार्टरने एसएसबीसाठी शिफारस केलेली शिफारस असावी, टेक्नीकल ग्रॅज्युएट कोर्ससाठी एसएसबी मुलाखतीचे कॉल लेटर तसेच युनिव्हर्सिटी एन्ट्री स्किमसाठी एसएसबी कॉल लेटर अथवा एसएसबीच्या शिफारस यादीत नाव असणे आवश्यक आहे. अधिक माहितीसाठी ०२५३-२४५१०३२ या दूरध्वनी क्रमांकावर सकाळी १० ते सायंकाळी ५.३० या कार्यालयीन वेळेत संपर्क साधण्याचे आवाहन करण्यात आले आहे.