गोदास्वच्छतेसाठी पूर्णवेळ सफाई कर्मचारी

म. टा. खास प्रतिनिधी, नाशिक

गोदावरीत अस्वच्छता करणाऱ्यांच्या विरोधात कारवाईसाठी महापालिकेने सुरक्षा रक्षकांची नियुक्ती केल्यानंतर आता नदीच्या स्वच्छतेसाठी पूर्णवेळ सफाई कर्मचारी देण्याची तयारी सुरू केली आहे. गोदावरीच्या दोन्ही बाजूंकडील १९ किलोमीटरच्या स्वच्छतेसाठी ६० सफाई कर्मचाऱ्यांची नियुक्ती केली जाणार असल्याची माहिती आयुक्त अभिषेक कृष्णा यांनी दिली. गोदावरी संवर्धन कक्षाच्याअंतर्गत हे सफाई कर्मचारी तैनात राहणार आहे. सोबतच एक विभागीय स्वच्छता निरीक्षक आणि दोन स्वच्छता निरीक्षकांचीही स्वच्छतेवर निगराणी राहणार आहे. काही दिवसांनंतर स्वच्छतेसाठी दोन पाळ्यांत कर्मचारी नियुक्त केले जाणार असल्याचेही आयुक्तांनी यावेळी सांगितले.
हायकोर्टाने गोदावरीच्या प्रदूषणासंदर्भात फटकारल्यानंतर महापालिकेने गोदास्वच्छतेला प्राधान्य दिले आहे. गोदावरीची स्वच्छता आणि देखरेखीसाठी पालिकेत स्वतंत्र गोदावरी संवर्धन कक्ष तयार करण्यात आला आहे. त्यापाठोपाठ गोदावरी नदीत प्रदूषण करणाऱ्या व्यक्तींविरोधात दंडात्मक कारवाईसाठी ४० सुरक्षा रक्षक तैनात करण्यात आले आहेत. तरीही गोदावरीच्या अस्वच्छतेचा प्रश्न कायम आहे. गोदावरीच्या आसपासचा परिसर स्वच्छतेसाठी नियुक्त केलेले सफाई कर्मचारीही स्वच्छतेवर लक्ष देत नसल्याचे समोर आले आहे. महापौर रंजना भानसी यांनी केलेल्या पाहणीत ३४ पैकी १८ सफाई कर्मचारी उपस्थित होते. त्यामुळे आयुक्तांनी या घटनेची गंभीर दखल घेतली असून, आता गोदावरीच्या स्वच्छतेसाठीच पूर्णवेळ सफाई कर्मचारी नियुक्त करण्याचा निर्णय घेतला आहे. पहिल्या टप्प्यात जवळपास ६० कर्मचारी नियुक्त केले जाणार आहेत. नाशिक शहरातून तब्बल साडेआठ किलोमीटर नदीचा प्रवाह आहे. त्यामुळे दोन्ही काठांवर मिळून ६० कर्मचारी नियुक्त राहणार असून, नदीकाठापासून ५० मीटरच्या परिसरात स्वच्छतेची जबाबदारी त्यांच्यावर असणार आहे. या कर्मचाऱ्यांवर लक्ष ठेवण्यासाठी स्वतंत्र विभागीय स्वच्छता निरीक्षकासह दोन स्वच्छता निरीक्षकही नियुक्त करण्यात येणार आहे. गोदावरी संवर्धन कक्षाअंतर्गत हे कर्मचारी काम करणार आहेत. दुसऱ्या टप्प्यात आणखी ५० असे जवळपास ११० सफाई कर्मचारी नियुक्त केले जाणार असून, ते दोन पाळीत काम करणार आहेत. त्यामुळे नदीकाठावरील अस्वच्छताही दूर होण्यास मदत होणार असल्याचे आयुक्तांनी यावेळी सांगितले.