टोळीच्या म्होरक्याची धिंड

म. टा. वृत्तसेवा, पंचवटी

शहरातील कुख्यात टोळ्यांपैकी एक असलेल्या मोरे टोळीला महाबळेश्वर येथे पकडण्यात पंचवटी पोलिसांना यश मिळाले. महाबळेश्वर येथे जाऊन गुन्हे शोधपथकाने मंगळवारी ही कारवाई केली. या टोळीचा म्होरक्या व्यंकटेश (व्यंक्या) याची शुक्रवारी सायंकाळी पोलिसांनी शहर परिसरात धिंड काढली.

गेल्या काही महिन्यांपासून गुन्हेगारांच्या मुस्क्या आवळण्याच्या प्रकारात गुन्हेगाराच्या भागातच त्याची वरात काढण्याची मोहिम पोलिस राबवित आहे. त्यामुळे गुन्हेगारांना रस्त्यावर फिरवून त्यांचा असली चेहरा जनतेसमोर आणल्यामुळे गुन्हेगारांवर चांगला जरब बसू लागला आहे. पंचवटी पोलिसांच्या ताब्यात असलेला व्यंकटेश (व्यंक्या) मोरे याला शुक्रवारी सायंकाळी पंचवटी पोलिस ठाण्यातून रविवार कारंजा येथे आणण्यात आले. तेथून त्याची वरात काढण्यात आली. पोलिस उपायुक्त लक्ष्मीकांत पाटील यांच्यासह पंचवटी, सरकारवाडा, भद्रकाली या तिन्ही पोलिस ठाण्याचे अधिकारी आणि कर्मचारी यांनी व्यंक्याची धिंड काढली. गुन्हेगार आणि पोलिसांचा ताफा बघण्यासाठी रस्त्यांच्या दुतर्फा नागरिकांची प्रचंड गर्दी झाली होती. रविवार कारंजापासून मेनरोडने धुमाळ पांईट पुन्हा रविवार कारंजा आणि त्यानंतर अशोकस्तंभ या भागात ही वरात नेण्यात आली. तेथून त्याला सरकारवाड्यात नेण्यात आले.

२५ गुन्ह्यांची नोंद

व्यंक्यावर खंडणी, लुटमार, खून अशा प्रकारचे २५ गुन्हे नोंदविण्यात आलेले आहेत. गेल्या वर्षी मखमलाबाद रोडवर आठ ते दहा जणांच्या टोळक्याने हल्ला केला होता. त्यात मोरे याचा समावेश होता. पूर्ववैमन्यातून झालेल्या या हल्ल्यात येथील भेळ विक्रेता सुनील वाघ याचा बळी तर त्याचा भाऊ हेमंत वाघ गंभीर जखमी झाला होता. खूनाच्या प्रकरणानंतर व्यंक्या फरार झाला होता. मोठ्या शिताफीने पोलिसांनी त्याला महाबळेश्वर येथे जाऊन पकडले.