म. टा. प्रतिनिधी, नाशिक
विद्यार्थ्यांना शालेय जीवनात पर्यावरणाचे महत्त्व प्रभावीपणे पटवून देण्यासाठी 'मविप्र'च्या शहरातील शिशू बालविहार, वाघ गुरुजी विद्यालय गंगापूररोड, होरायझन अॅकॅडमी, मराठा हायस्कूल या शाळांमध्ये पर्यावरणपूरक वस्तूंपासून गणेशमूर्ती तयार करण्याच्या कार्यशाळा घेण्यात आल्या. त्यात विद्यार्थ्यांनी पर्यावरणपूरक वस्तूंपासून गणेशमूर्ती साकारल्या.
सण-उत्सवाच्या काळात होणारे जल, ध्वनी, वायू प्रदूषण टाळण्यासाठी पालवी फाऊंडेशनकडून पर्यावरणाच्या संवर्धनासाठी पर्यावरणपूरक गणेशोत्सव स्पर्धेचे आयोजन करण्यात आले आहे. पर्यावरणपूरक वस्तूंपासून गणेशमूर्ती बनविणे, सजावट करणे व पर्यावरणपूरक पद्धतीने विसर्जन करणे या तीन मुख्य निकषांवर ही स्पर्धा आधारित आहे. या स्पर्धेच्या प्रचार व प्रसारासाठी संस्थेतर्फे या शाळांमध्ये कार्यशाळा घेण्यात आल्या. पर्यावरणपूरक गणेशोत्सव स्पर्धेत सहभाग नोंदविण्यासाठी ९८३४५६४४५४ या क्रमांकावर संपर्क साधावा, असे आवाहन करण्यात आले आहे. विजेत्या स्पर्धकांना सायकल, घड्याळ, स्कूल बॅग व प्रशस्तिपत्रके देण्यात येतील.
या कार्यशाळांमध्ये विद्यार्थ्यांना सुपारी, साधा कागद, नारळ, रंगीत कागद आदी पर्यावरणपूरक वस्तूंपासून सुबक गणेश कलाकृती व सजावट तयार करण्याचे प्रशिक्षण देण्यात आले. कार्यशाळा यशस्वीतेसाठी पालवी फाऊंडेशनच्या डॉ. सुवर्णा पवार, दीपा खेडकर यांचे सहकार्य लाभले. यावेळी मराठा विद्या प्रसारक समाज संस्थेचे कलाशिक्षक रमेश तुंगार, दत्तात्रय पवार, सोमेश्वर मुळाणे, कृष्णा जाधव, प्रल्हाद मुठाळ आदी उपस्थित होते.
---
(फोटो)