म. टा. खास प्रतिनिधी, नाशिक
विविधरंगी फुले, वेलींनी बहरलेली शाळा कुणाला आवडणार नाही. आपण शिकतो त्या शाळेत आपणच उद्यान फुलविण्याचा आनंद विलक्षण आणि निसर्गाच्या जवळ नेणारा असू शकतो. महापालिकेच्या शाळांपैकी २० शाळांमधील विद्यार्थी हा आनंद घेऊ शकणार आहेत. शालेय वयातच विद्यार्थी निसर्गाच्या जवळ यावेत आणि निसर्गाशी गट्टी जमून त्यांना पर्यावरणस्नेही बनविता यावे, याकरीता शहरातील निवडक शाळांमध्ये उद्यान विकसित करण्याचा निर्णय महापालिकेने घेतला आहे.
पर्यावरण संवर्धनाचे प्रयत्न विविध पातळीवर सुरू आहेत. शालेय विद्यार्थ्यांमध्ये वृक्षारोपणाबरोबरच पर्यावरण संवर्धनाची गोडी निर्माण व्हावी आणि निसर्गाशी त्यांचे घट्ट मैत्रीचे नाते वृध्दींगत व्हावे याकरीता शहरातील विद्यालयांच्या आवारातच उद्यान विकसित करण्याचा निर्णय महापालिकेने घेतला आहे. शाळेची इमारत आणि खेळाचे मैदान वगळताही मुबलक जागा उपलब्ध असलेल्या शाळांमध्ये ही उद्याने विकसित करण्यात येणार आहेत.
शहरात महापालिकेच्या ९० शाळा असून त्यामध्ये २५ हजार विद्यार्थी शिक्षण घेत आहेत. त्यापैकी २० शाळांच्या आवारात उद्यान विकसित करण्यासाठी पुरेशी जागा उपलब्ध असल्याने तेथे उद्यान फुलविण्याचा महापालिकेचा प्रयत्न आहे. विशेष म्हणजे महापालिकेचा उद्यान विभागही येथे बाग फुलविण्याचे काम करू शकतो. परंतु तसे न करता महापालिकेने शाळेत शिकणाऱ्या विद्यार्थ्यांच्या मदतीनेच येथे बाग फुलविण्याचा प्रयत्न करण्याचा निर्णय घेतला आहे. नवीन आर्थिक वर्षात म्हणजेच एप्रिलनंतर या निर्णयाची अंमलबजावणी करण्यात येणार आहे.
-
प्रत्यक्ष सहभाग
पाठ्य पुस्तकातील धडे शिकविण्यापलीकडे विद्यार्थ्यांना शाळेत काही शिकविले जात नाही. त्यामुळे विविध जातींची रोपे, फुले यांची माहिती विद्यार्थ्यांना असण्याचाही प्रश्न उद्भवत नाही. परंतु शालेय वयातच विद्यार्थ्यांना झाडांच्या जाती कळल्या, झाडे कशी लावतात, त्यांना किती पाणी घालावे, झाडे वाढावीत याकरीता त्यांना कोणती खते द्यायला हवीत, किती प्रमाणात द्यायला हवीत, सेंद्रीय खते म्हणजे काय यासारखी माहिती मिळू शकली तर त्यांनाही झाडांचा लळा लागू शकतो. झाडांचे महत्त्व, त्यांची उपयुक्तता विद्यार्थ्यांना समजणे त्यामुळे शक्य होणार आहे.
.....
बुलेट्स
-महापालिकेच्या २० शाळांमध्ये राबविणार उपक्रम
-विद्यार्थ्यांच्या मदतीनेच फुलणार उद्याने
-प्रात्यक्षिकातून मिळणार शिकण्याची संधी