म. टा. खास प्रतिनिधी, नाशिक
मुथूट दरोड्यातील फरार आरोपींपैकी एक असलेल्या आरोपीस शहर पोलिसांनी हरियाणा राज्यातून अटक केल्याची माहिती सूत्रांनी दिली. दरोड्यापूर्वी हा संशयित नाशिकमध्ये सिक्युरीटी गार्ड म्हणून नोकरीस होता. सुभाषनेच परजिल्ह्यातून आलेल्या इतर आरोपींची सर्व व्यवस्था केली होती.
पोलिसांनी दिलेल्या माहितीनुसार, सुभाष गौड (रा. उत्तर प्रदेश) असे या चौथ्या संशयित आरोपीचे नाव आहे. सिक्युरीटी गार्ड म्हणून शहरात कामास असलेल्या गौडने इतर आरोपीची त्याच्या घरी राहण्याची, रेकी करण्यासाठी इतर सुविधा पुरविण्याची जबाबदारी घेतली होती. दरोड्याच्या एका दिवसापूर्वी गौडने आपल्या कुटुंबियांना उत्तर प्रदेशातील मूळ गावी पाठवून दिले होते. गौडमुळे परराज्यांमधून आलेल्या संशयितांना दरोड्याचे नियोजन करणे सोपे झाले होते. अत्यंत नियोजनबद्ध पद्धतीने तयारी करण्यात आलेल्या दरोड्याच्या गुन्ह्यातील तब्बल १२ आरोपींपैकी आकाशसिंग राजपूत, त्याचा भाऊ जितेंद्रसिंग राजपूत आणि परमेंदरसिंग यांना पोलिसांनी टप्प्याटप्पाने अटक केली होती. गौडसह इतर आरोपी मात्र वेळोवेळी पोलिसांना चकवा देण्यात यशस्वी ठरले होते. मात्र पोलिसांचा तपास सुरूच होता.
एका पथकाला गौडचा थांगपत्ता लागला. या पथकाने हरियाणा येथून आरोपीला अटक केली. उंटवाडीतील मुथूट फायनान्स कंपनीच्या कार्यालयात १४ जून रोजी सशस्त्र दरोडा पडला होता. या घटनेत सॅज्यु सॅम्युअल या आयटी इंजिनीअरची गोळ्या झाडून हत्या केली होती. या गुन्ह्यात सुबोध सिंग हा मुख्य आरोपी असून, तो सध्या बिहार राज्यातील कारागृहात बंद आहे. याच कारागृहात बसून सुबोध सिंगने दरोड्याचा कट आखला होता. पोलिसांनी दिलेल्या माहितीनुसार लवकरच त्यालाही ताब्यात घेण्यात येऊ शकते.