'दस्तूर बचाव कमिटी'च्या शान-ए-हिंद यांची माहिती
म. टा. वृत्तसेवा, मालेगाव
केंद्राने लागू केलेला सीएए कायदा व एनआरसी तसेच एनपीआर प्रक्रियेविरोधात येथील दस्तूर बचाव कमिटीने जनता दल गटनेत्या शान-ए-हिंद यांच्या नेतृत्वाखाली मालेगाव महापालिकेत महासभेत आवाज उठविण्याचे निश्चित केले आहे. तसेच २६ जानेवारी रोजी शहरात निदर्शने केली जाणार असल्याची माहिती शान-ए-हिंद यांनी उर्दू मीडिया सेंटर येथे पत्रकार परिषदेत दिली.
कमिटीच्या महिला पदाधिकारी पत्रकार परिषदेत उपस्थित होत्या. शान म्हणाल्या, हजारोच्या संख्येने मुस्लिम महिलांनी सीएए विरोधात मोर्चा काढला असून, पोलिस प्रशासनाने याविषयीची सत्य परिस्थिती सरकारला कळवावी. तसेच सहा जानेवारी रोजी निघालेल्या मोर्चात दिल्ली येथील जामिया विद्यापीठातील विद्यार्थिनी आयशा व लदीदा यांना सहभागी न करून घेण्यासाठी पोलिसांनी दबाव आणल्याचा आरोप केला. महापालिकेत येत्या महासभेत महागठबंधन आघाडीच्या गटनेत्या या नात्याने शान-ए-हिंद या सीएए कायदा केंद्राने मागे घ्यावा या मागणीचा ठरावा महापौर, आयुक्तांनी करावा, अशी मागणी करणार आहेत. महासभेत एकमताने कायद्याविरोधात ठराव झाल्यास मालेगावात कायद्याला विरोध आहे, असा संदेश केंद्र सरकारला मिळेल.
२६ ला निदर्शने
येत्या २६ जानेवारी प्रजासत्ताक दिनी आमदार मौलाना मुफ्ती इस्माईल यांच्या नेतृत्वात शहरातील वेगवेगळ्या ७० ठिकाणी ध्वजारोहण केले जाणार असून, दुपारी १२ ते ३ या वेळेत सीएए कायद्याविरोधात निदर्शने केले जातील, अशी माहिती त्यांनी दिली.