आई मारेल म्हणून मुलींनी रचला अपहरणाचा डाव

सिडको ः टीव्हीवरील मालिका पाहून दोघी बहिणींनी आपल्याच अपहरणाचा डाव रचला असल्याचे समोर आले आहे. आई मारेल या भीतीने त्यांनी हा डाव रचला असला तरी, सत्य समोर आल्याने पोल‌िसांनी सुटकेचा निःश्वास सोडला.

याबाबत पोल‌िसांनी दिलेली माहिती अशी की, सायंकाळी दोन्ही बहिणींचे अपहरण झाल्याची तक्रार त्यांच्या पालकांनी केली. त्यानुसार या मुलींची चौकशी केल्यावर त्यांनी सांगितले की, दुपारी एका चारचाकी गाडीतून चौघांनी आम्हाला शिवशक्ती चौकातील एका बंद घरात नेले. त्याठिकाणी आम्हाला डांबून ठेवले व ते चौघे मद्यपान करून निघून गेले. आम्ही प्रयत्न करून बाहेर पडलो व घरी गेलो. सुरुवातीला पोल‌िसांनाही यात तथ्य वाटले. याबाबतची सखोल चौकशी करण्यासाठी या दोघींना पोल‌िसांनी घटनास्थळी नेले. यावेळी संशय येऊ लागल्याने वरिष्ठ पोल‌िस निरीक्षक मधुकर कड यांनी या दोघींना वेगवेगळे ठेवून चौकशी केली असता, हा बनाव असल्याचे समोर आले.