गोपालकृष्ण मंदिरांमध्ये गोपाळकाल्याचा उत्सव
....
म. टा. खास प्रतिनिधी, नाशिक
शहरातील गोपालकृष्ण मंदिर, तसेच गल्ल्यांमध्ये गोपाळकाला उत्साहात साजरा करण्यात आला. यानिमित्त विविध धार्मिक कार्यक्रमांची रेलचेल होती. शहर व परिसरातील मुख्य चौकांमध्ये शनिवारी उत्साहपूर्ण वातावरणात 'ढाक्कुमाकुम', 'बोल बजरंग बली की जय' च्या गजरात दहीहंडी उत्सव प्रचंड उत्साहात आणि तितक्याच शांततेत साजरा करण्यात आला.
'एकीकडे गोविंदा रे गोपाळा', 'मच गया शोर सारी नगरी मे' अशी वेगवेगळी गीते, तर दुसरीकडे त्या तालावर हंडी फोडण्यासाठी चिमुकल्यांची धडपड चालली होती. संपूर्ण शहरभरात गोपालकृष्ण मंदिरांमध्ये सकाळपासूनच गोपाळकालामुळे उत्साही वातावरण दिसून आले. मंडळांच्या वतीने स्पर्धात्मक उंच उंच रोख रक्कमेच्या दहीहंड्या बांधण्यात आल्या होत्या. शहरात अनेक मंडळे आपापल्या गल्लीमध्ये दहीहंडी उत्सव साजरा करताना डिजे वाजवत होती. गोविंदांना पावसाने भिजवण्यासाठी काही वेळासाठी दमदार हजेरी लावल्याने आनंदाचे वातावरण होते.
विविध वयोगटांतील दहीहंडीप्रेमींनी सर्वांचे लक्ष वेधून घेतले. पंचवटी, सिडको, गोदाघाट, घनकर गल्ली, माहेश्वरी वसतिगृह येथील मंडळांनी आपापल्या भागात लहान-मोठ्या दहीहंडीचे आयोजन केले होते. शहर व परिसरात दहीहंडीचा उपक्रम प्रामुख्याने शाळांमध्ये उत्साहात साजरा झाला. रात्री उशिरापर्यंत दहीहंडी फोडून काल्याचा प्रसाद घेत नागरिकांनी उत्सवाचा आनंद लुटला. दहीहंडी फोडण्यात यशस्वी झालेल्या संघांना आकर्षक बक्षिसे देण्यात आली. बाळगोपाळांनी नृत्य, खेळाच्या माध्यमातून मनसोक्त आनंद लूटला.
सकाळी पंचवटीतील मुख्य पाच मंदिरांची दिंडी, पालखी व रथ मिरवणूक काढण्यात आली. शहरातील प्रमुख मार्गांवर ही सवाद्य मिरवणूक फिरून आल्यावर पंचवटीत कपालेश्वर मंदिराजवळ सांगता करण्यात आली.