म. टा. खास प्रतिनिधी, नाशिक
ब्रेन डेड झालेल्या महिलेचा अवयवदानाचा महत्त्वाचा निर्णय डॉक्टर, नातेवाइकांनी घेतला आणि वैद्यकीय पथकासह पोलिस यंत्रणा कामाला लागली. अवयवांपैकी सर्वांत महत्त्वाचे मानले जाणारे लिव्हर पुण्याच्या दिशेने जाताना अडथळा नको म्हणून पोलिसांनी ग्रीन कॉरिडोर तयार केले. यामुळे अवघ्या दोन तास ४७ मिनिटांत नाशिक ते पुणे अंतर पार करून लिव्हर आपल्या ठिकाणापर्यंत पोहोचले.
ब्रेनडेड झालेल्या व्यक्तीचे अवयव दान केल्यास त्या अवयवाच्या मदतीने कोणाचे तरी प्राण वाचू शकतात, याबाबत सर्वच स्तरांतील नागरिकांमध्ये जनजागृती होत आहे. अवयवदानासाठी नागरिक स्वतः पुढाकार घेताना दिसतात. ब्रेनडेड घोषित करण्यात आलेल्या भारती मधुकर देवरे (वय ६५) घरात पडल्याने त्यांच्या मेंदूला मार लागला होता. त्यांच्या मेंदूवर २२ ऑक्टोबर रोजी सुयश हॉस्पिटलमध्ये शस्त्रक्रिया करण्यात आली. दुर्दैवाने २६ ऑक्टोबर रोजी देवरे यांचा मेंदू मृतावस्थेत पोहोचला. यानंतर त्यांना सिक्स सिग्मा हॉस्पिटलमध्ये दाखल करण्यात आले. तिथे अपनिया टेस्ट झाली. आहे त्या अवस्थेतून रुग्ण बाहेर पडणे शक्यच नसल्याने देवरे यांची मुलगी डॉ. अंजली शिंदे आणि त्यांचे पती डॉ. संजय आहेर, तसेच इतर परिवाराच्या इच्छेनुसार अवयवदान करण्याचा निर्णय घेण्यात आला. हॉस्पिटलच्या सुपरिटेंडंट डॉ. विशाखा, डॉ. संजय रकिबे, डॉ. दुगड आणि संदीप खिंवसरा आदींनी यासाठी प्रयत्न केले. लिव्हर आणि दोन डोळ्यांचे कॉर्निया यशस्वीरीत्या शरीरापासून विलग करण्याची प्रक्रिया पार पडली. कॉर्निया शहरातच ठेवण्यात आले, तर लिव्हर पुण्याच्या डी. वाय. पाटील हॉस्पिटलमध्ये रवाना करण्यात आले. कमीत कमी वेळेत पुणे येथे पोहोचण्याची तयारी करण्यात आली. शहर पोलिस आणि शहर वाहतूक शाखेने यासाठी ग्रीन कॉरिडोर तयार केले. पोलिस आयुक्त विश्वास नांगरे पाटील, वाहतूक विभागाचे सहाय्यक पोलिस आयुक्त मंगलसिंग सूर्यवंशी, तसेच इतर अधिकारी व कर्मचाऱ्यांनी यासाठी पुढाकार घेतला. पोलिसांच्या बंदोबस्तात अवघ्या दोन तास ४७ मिनिटांत लिव्हर पुणे येथे पोहोचले.