नाशिकचे प्रश्न आज मुख्यमंत्रीदरबारी; निवडणुकीच्या तोंडावर शिंदे गटाची भाजपवर आघाडी

नाशिक : गत आठवड्यात पालकमंत्री दादा भुसे यांनी महापालिकेच्या विविध प्रश्नांसंदर्भात थेट महापालिकेतच बैठक घेतल्यानंतर आता नाशिकच्या प्रश्नांसंदर्भात आज, शुक्रवारी (दि. ७) मुख्यमंत्री एकनाथ शिंदे यांच्या उपस्थितीत मुंबईत बैठक होणार आहे.

आगामी महापालिका निवडणुकीच्या पार्श्वभूमीवर नाशिकमधील शिंदे गट अधिकच सक्रिय झाल्याचे चित्र आहे. महापालिकेतील नोकरभरती, पाणीपुरवठा योजनांसंदर्भात रखडलेले प्रस्ताव आणि सिंहस्थ कुंभमेळ्याच्या नियोजनासह विविध विषयांवर मंत्रालयात आज दुपारी दीड वाजता बैठक होणार असून, नाशिकच्या प्रश्नांसंदर्भात भाजपची पीछेहाट होऊन शिंदे गटाची सुरू असलेली आघाडी आता चर्चेचा विषय बनली आहे.

...या विषयांवर चर्चेची चिन्हे

मुख्यमंत्र्यांसोबतच्या बैठकीत प्रामुख्याने महापालिकेची प्रलंबित नोकरभरती, सन २०२७ मध्ये होत असलेल्या सिंहस्थ कुंभमेळ्याच्या नियोजनाचा समावेश असण्याची शक्यता आहे. सिंहस्थापूर्वी ६० मीटरचा बाह्य रिंगरोड साकारला जाणार असून, त्यासाठी निधीची मागणी केली जाणार आहे. पाणीपुरवठ्याशी संबंधित प्रलंबित विषयांवरही या बैठकीत चर्चा होऊ शकते, असे आयुक्त डॉ. चंद्रकात पुलकुंडवार यांनी सांगितले आहे. निवडणुकीच्या तोंडावर आता पालिकेतील प्रलंबित विषय मार्गी लावून त्यांचे श्रेय घेण्याचा प्रयत्न शिंदे गटाने सुरू केला आहे. त्यामुळे आजच्या बैठकीकडे भाजपसह नाशिककरांचे लक्ष लागले आहे.

-शिंदे गटने पालकमंत्रिपद पटकावल्यानंतर भाजप बॅकफूटवर

-गत आठवड्यात पालकमंत्री भुसेंची महापालिकेत बैठक

-शिंदे गटाचे खासदार, आमदार, पदाधिकारी उपस्थित

-भाजपच्या लोकप्रतिनिधींना डावलल्याने नाराजी

-भाजपचे पाच आमदार, एक खासदार, पालिकेत सत्ता असूनही डावलले

-शिंदे गटाचे अवघे दोन आमदार, एक खासदार, संघटनात्मक स्थिती कमकुवत

-ताकद वाढविण्यासाठी शिंदे गटाकडून नाशिकची निवड