नाशिक: सत्ता येताच गुजराती भाषेतले बोर्ड झळकले

नाशिक : महापालिकेत भाजपला स्पष्ट बहुमत मिळताच गुजराती भाषेला अच्छे दिन येऊ लागले आहेत. महापालिकेच्या निवडणुकीची धामधूम संपताच रामकुंडावर गुजराती भाषेचे सूचनाफलक झळकायला लागल्याने पर्यटकांच्या भुवया उंचावल्या आहेत. महाराष्ट्रात मराठीऐवजी गुजराती भाषेचा वापर अचानक वाढल्याने मुंबईकरांनी नुकतेच आंदोलन केले होते. त्याची लागण नाशिकला झाली असून, पंचवटीतील अनेक धार्मिक स्थळे आणि रस्त्यांवर अचानक गुजराती भाषेतील बोर्ड लागल्याने यात्रेकरू आश्चर्य व्यक्त करीत आहेत.

मुंबईवर मराठी माणसाचे वर्चस्व की गुजराथी माणसाचे असा अनेक वर्षांपासून वाद आहे. यावर शिवसेनाप्रमुख बाळासाहेब ठाकरे यांनीही आवाज उठवला होता. मोदी सरकार स्थापन झाल्यानंतर मुंबईतील वातावरण अचानक बदलले असून, अनेक व्यावसायिकांनी आपल्या दुकानांचे बोर्ड मराठीबरोबरच गुजराती भाषेतून तयार केले असून, महाराष्ट्र सरकाराचे नियम धाब्यावर बसवले आहेत. मध्य रेल्वेने उपनगरीय गाड्या व आरक्षण तिकिटांवर गुजराती भाषेचा वापर केला आहे. महाराष्ट्रातून उत्तर भारतात जाणाऱ्या गाड्या तसेच, ज्यांचे प्रवासी हे हिंदी भाषिक आहेत त्यांनाही गुजराथी भाषेची तिकिटे दिली जात असून, अनेक रेल्वे स्टेशनवरचे दिशादर्शक बोर्डही गुजराथी भाषेत नव्याने तयार केले आहेत. बेस्टकडून व रिलायन्सकडून देण्यात येणाऱ्या विजेचे बिल गुजराथी भाषेत देण्यास सुरुवात झाली असून, महाराष्ट्रात अचानक गुजराथी भाषेचे बोर्ड चमकू लागल्याने असे परिवर्तन कसे झाले? याचा अनेकांना प्रश्न पडला आहे.

एचडीएफसी बँकेने आपल्या वेबसाईटवर मुंबईची प्रमुख भाषा म्हणून गुजराथीचा उल्लेख केला होता. मात्र मुंबईच्या नागरिकांनी आंदोलन केल्यानंतर हा उल्लेख काढून टाकण्यात आला. याच पार्श्वभूमीवर नाशिक महापालिकेने रामकुंडावर गुजराती भाषेतील बोर्ड लावले आहेत. हे बोर्ड मराठी, गुजराथी व इंग्रजीतून लावण्यात आले आहेत.

केवळ गुजराती भाषेचेच बोर्ड का?

रामकुंडावर देश-विदेशातून लोक येत असतात. येथे हिंदीचा वापर केल्यास अनेकांना ही भाषा समजू शकेल. गुजराती भाषेत बोर्ड लावून ती किती लोकांना समजेल असा प्रश्न आहे. नाशिक महापालिकेने बोर्ड लावताना केवळ गुजराथी भाषेचीच का निवड केली? इतर भाषांनी काय घोडं मारलं असा सवाल नागरिक विचारत आहेत. या भाषा बदलामागे काय दडलं आहे हे तपासण्याची मागणी होत आहे.