म. टा. प्रतिनिधी, नाशिक
रविवार हा सुटीचा वार. खरेदीपासून हॉटेलिंगपर्यंत सर्वच पातळीवर नियोजन करीत एरव्ही नागरिक घराबाहेर पडतात. सायंकाळी तर रस्ते वर्दळीने फुलून जातात. मात्र, या वेळचा रविवार नाशिककरांसाठी विसावा घेऊनच आला. सतत पायरव असलेल्या मेनरोडनेही विश्रांती घेतली होती, तर जागोजागी असलेले स्ट्रीट फूडही या वेळी दिसत नव्हते. संपूर्ण नाशिक निर्मनुष्य झाले होते. जिल्ह्यातील सर्वच गावेही ओस पडल्याचे चित्र होते. रविवारी अनेक गावांत आठवडे बाजार भरतो. या वेळी तोही दिसला नाही. स्वातंत्र्यानंतर प्रथमच नाशिक जिल्ह्याने ही अभूतपूर्व शांतता पाहिली.
जिल्ह्यासह नाशिककरांनी सायंकाळी थाळीनाद, टाळ्या वाजवून वैद्यकीय पथकाचे कौतुक केले. नाशिकमध्ये अद्याप करोनाचा रुग्ण आढळलेला नाही. शनिवारी दाखल झालेल्या चारही संशयित रुग्णांचे अहवाल निगेटिव्ह आले असून, प्रशासनाने सुटकेचा नि:श्वास सोडला आहे. असे असले तरी करोनासह आरोग्य विभागाला स्वाइन फ्लूनेही आव्हान निर्माण केले आहे. आजमितीस सिव्हिल हॉस्पिटलमध्ये करोनाचा एक संशयित, स्वाइन फ्लूच्या तिघांवर उपचार सुरू आहेत. यातील दोघांचे स्वाइन फ्लूसाठी अहवाल पॉझिटिव्ह आले आहेत.
तरुण संशयित दाखल
राज्यात करोनाचा फैलाव जलदगतीने होत असल्याचे रविवारी दिसून आले. विशेषत: मुंबई आणि पुणे ही नाशिकच्या जवळील शहरांमध्ये प्रादुर्भाव वाढतो आहे. सिव्हिल हॉस्पिटलमध्ये दाखल चार रुग्णांचे अहवाल प्रलंबित असल्याने जिल्हा आरोग्य विभागाचे लक्ष या अहवालाच्या निकालाकडे लागले होते. सुदैवाने या चौघांचे अहवाल निगेटिव्ह आले आहेत. दरम्यान, सिव्हिल हॉस्पिटलमध्ये तीन स्वाइन फ्लू रुग्ण दाखल आहेत. त्यापैकी दोघांचे अहवाल स्वाइन फ्लूसाठी पॉझिटिव्ह आले असून, उर्वरित एकाचा अहवाल प्रलंबित आहे. रविवारी दिवसभरात करोना विलगीकरण कक्षात एका २४ वर्षांच्या तरुणाला दाखल करण्यात आले. सूत्रांनी दिलेल्या माहितीनुसार या तरुणाला न्यूमोनियाचा त्रास होतो आहे. स्वाइन फ्लूसाठी त्याचा अहवाल निगेटिव्ह असल्याने त्याला करोना कक्षात ठेवण्यात आले आहे. या तरुणाचा परदेशी प्रवासाचा इतिहास नसल्याने त्याला हा त्रास नेमका कशामुळे होतो आहे, याचा शोध सुरू असल्याचे सिव्हिल हॉस्पिटलच्या सूत्रांनी स्पष्ट केले.