विद्यार्थ्यांनी केली हेल्मेट जनजागृती
नाशिकरोड : नाशिकरोड येथील गोखले एज्युकेशन सोसायटीच्या सर डॉ. मो. स. गोसावी तंत्रनिकेतनच्या शिक्षक व विद्यार्थ्यांनी दत्तमंदिर सिग्नल येथे वाहतूक नियमांची व हेल्मेट सक्तीची फलकांद्वारे जनजागृती केली.
प्राचार्य प्रा. प्रदीप देशपांडे व उपप्राचार्य प्रा. पूनमचंद जैन यांनी त्यांना मार्गदर्शन केले. प्रा. पंकज धर्माधिकारी, प्रा. घनश्याम बोराटे, प्रा. जयंत महाजन, प्रा. मिलिंद बोबडे, प्रा. आनंद पंचाक्षरी, प्रा. दिगंबर झोमन, प्रा. अमित सदगीर, प्रा मिलिंद राणे, प्रा. सारंग अजनाडकर आदी उपक्रमात सहभागी झाले. नाशिक शहर वाहतूक शाखेच्या परवानगीने गोसावी तंत्रनिकेतनच्या शिक्षक व विद्यार्थ्यांनी मिळून हा अभिनव उपक्रम राबविला. विद्यार्थ्यांनी सिग्नलवर थांबलेल्या वाहनचालकाला हेल्मेट सक्ती का गरजेची आहे हे पटवून दिले. सुरक्षित वाहतूक व वाहतूक नियमांचे योग्य पालन केल्याने स्वतःचा व दुसऱ्यांचा जीव कसा वाचू शकतो हे देखील सांगितले. 'हेल्मेट स्वतःसाठी व कुटुंबासाठीदेखील', 'आपला जीव सांभाळा, दुर्घटना व अपघात टाळा' अशा फलकांद्वारे शिक्षकांनी व विद्यार्थ्यांनी जनजागृती केली. त्याला नागरिकांनी चांगला प्रतिसाद दिला.