म. टा. खास प्रतिनिधी, नाशिक
जागतिक एड्स दिनाचे औचित्य साधून जिल्ह्यात जनजागृती पंधरवडा साजरा करण्यात येणार आहे. यानिमित्त सोमवारी जिल्हा प्रशासनाच्या आरोग्य विभागासह स्वयंसेवी आणि सामाजिक संस्थांनी जनजागृती रॅलीचे आयोजन केले आहे. जिल्हा प्रतिबंध व नियंत्रण पथकाद्वारे जनजागृती करण्यात येणार असून पथनाट्याबरोबरच यंदा लोककलांचीही मदत घेण्यात आली आहे.
१ डिसेंबरला हा दिवस जागतिक एड्स दिन म्हणून साजरा केला जातो. यानिमित्त दरवर्षी विविध उपक्रमांचे आयोजन केले जाते. यंदा हा दिवस रविवारी आल्यामुळे सोमवारपासून विविध उपक्रम करण्याचा निर्णय सिव्हील हॉस्पिटल प्रशासनासह स्वयंसेवी आणि सामाजिक संस्थांनी घेतला आहे. सोमवारी सकाळी आठ वाजता सिव्हील हॉस्पिटल येथून जनजागृती रॅली काढण्यात येणार आहे. प्रभारी जिल्हाधिकारी भुवनेश्वरी एस., महापालिका आयुक्त राधाकृष्ण गमे, पोलिस आयुक्त विश्वास नांगरे-पाटील, अपर जिल्हाधिकारी नीलेश सागर, जिल्हा शल्य चिकीत्सक डॉ. सुरेश जगदाळे आदी मान्यवर यावेळी उपस्थित राहणार आहेत. विविध शाळा, महाविद्यालयांमधील विद्यार्थी या रॅलीमध्ये सहभागी होऊन जनजागृती करणार आहेत. सिव्हील हॉस्पिटलमधून निघणारी ही रॅली त्र्यंबकनाका, जिल्हा परिषद, कालिदास कला मंदीर, शालीमार चौक, सीबीएसमार्गे पुन्हा मुख्य रस्त्याने त्र्यंबकनाकामार्गे सिव्हील हॉस्पिटल येथे पोहोचणार आहे.
रॅली मार्गावर विद्यार्थ्यांकडून ठिकठिकाणी पथनाट्य सादर करण्यात येणार आहे. निफाड येथील लोककला पथक या उपक्रमातील विशेष आकर्षण असणार आहे. रॅलीच्या समारोपानंतर या पथकाद्वारे सिव्हील हॉस्पिटल प्रवेशद्वारालगतच्या व्यासपीठावर लोककला सादर केली जाणार आहे. याशिवाय जिल्हा प्रशासनाच्या वतीने आयोजीत पंधरवड्यात ५ डिसेंबरपर्यंत तालुका स्तरावर ठिकठिकाणी रॅली काढून जनजागृती करण्यात येणार आहे. यासह मानवी साखळी, चित्रकला, व्याख्याने, रांगोळी स्पर्धा यांसारख्या उपक्रमांचे आयोजन करण्यात आल्याची माहिती जिल्हा प्रतिबंध व नियंत्रण पथक (DAPCU) चे कार्यक्रम अधिकारी योगेश परदेशी यांनी दिली आहे.