म. टा. वृत्तसेवा, जेलरोड
देवळालीगावातील म्हसोबा मंदिरासमोर तलवारीने केक कापून वाढदिवस साजरा करण्याऱ्या टवाळखोरांना पोलिसांनी पकडून धारेवर धरले तसेच गुन्हा दाखल केला आहे.
इंद्रजित दशरथ विश्वकर्मा (२४, रा. हांडोरे मळा, वडनेर रोड, विहितगाव) याचा मंगळवारी वाढदिवस होता. त्याला ताब्यात घेण्यात आले आहे. त्याचे मित्र पळून गेले आहेत. सहायक पोलिस आयुक्त मोहन ठाकूर, नाशिकरोड ठाण्याचे वरिष्ठ निरीक्षक पंढरीनाथ ढोकणे, उपनगरचे प्रभाकर रायते यांच्यासह पोलिस कर्मचारी गस्तीवर होते. छत्रपती शिवाजी महाराज पुतळा, डॉ. बाबासाहेब आंबेडकर पुतळा मार्गे सुभाष रोड देवळाली गाव म्हसोबा मंदिरासमोर ते आले असता धाडीवाल कपड्याच्या दुकानासमोर मोपेड गाडीवर (एम. एच.१५ एफ सी ८३१०) केक ठेऊन आठ ते दहा तरुण तलवारीने केक कापून इंद्रजित विश्वकर्माचा वाढदिवस साजरा करत होते. त्यांचा गदारोळ वाढतच होता. पोलिस आल्यानंतर या तरुणांनी धूम ठोकली. पोलिसांनी इंद्रजित विश्वकर्माला ताब्यात घेतले. पोलिस नाईक राजेंद्र जाधव यांनी त्याच्याविरुद्ध गुन्हा दाखल केला आहे.