ग्रामीण भागातून वाढता ‌प्रतिसाद

मनमाड : चांदवड, नांदगाव तालुका व मनमाड शहरातून हजारो मराठा बांधव मुंबई मोर्चाला हजेरी लावणार आहेत. चांदवडमधून सुमारे ८० वाहने भरून मंगळवारी मुंबईकडे रवाना झाली. कार, जीप यासह विविध वाहनांमधून हजारो मराठा बांधव मुंबईला रवाना झाले. चांदवड येथून मुंबईकडे बुधवारी (दि. ९) पहाटे तीन वाजता बसेसद्वारे मोर्चेकऱ्यांनी मुंबईला लवकर पोहचण्याचा प्रयत्न केल्याचे सांगितले जात आहे.
मोर्चासाठी राज्यराणी एक्स्प्रेस सजविण्यात आली. तसेच रेल्वेने होणाऱ्या प्रवासात मराठा मोर्चाचा आवाज घुमणार असल्याचे मयूर बोरसे यांनी सांगितले. मोर्चात तालुक्यातील मराठा माजी आमदार सहभागी होणार असल्याचीही माहिती त्यांनी दिली.

‘सेवाग्राम’ला पसंती
नांदगाव तालुक्यातील मराठा समाजातील मंडळी बुधवारी खासगी वाहनाने मुंबई गाठणार आहेत. तर अनेकांनी बुधवारी सकाळी नागपूर दादर सेवाग्राम एक्स्प्रेसने मुंबईला जाण्यास प्राधान्य दिले. मराठा समाजाचा आवाज बुलंद करण्यासाठी मोठ्या संख्येने नांदगाव तालुक्यातून मराठा बांधव मोर्चात हजेरी लावल्याचे स्वयंसेवकांनी सांगितले.

घोषणांनी दणाणले शहर
सिन्नर फाटा : नाशिकरोडसह परिसरातील विहितगाव, देवळालीगाव, चेहेडी, चाडेगाव, शिंदे-पळसे, जाखोरी, एकलहरे, कोटमगाव, सामनगाव, दसक-पंचक, नांदूर नाका आदी भागातील हजारो मराठा समाज बांधव या ठिकाणी सकाळीच एकत्र जमल्याने या भागाला जत्रेचे स्वरुप प्राप्त झाले.
डोक्याला भगवे फेटे बांधलेल्या व वाहनावर भगवा ध्वज बांधलेल्या हजारो मरठा समाज बांधवांनी दिलेल्या घोषणांनी परिसर दणाणून गेला. सुनील बागूल, करण गायकर, गणेश कदम, किशोर जाचक, शिरीष लवटे, बंटी भागवत, पंडित आवारे आदींनी या ठिकाणी उपस्थित मोर्चेकऱ्यांना मार्गदर्शन केले. शिवाजी हांडोरे, गणेश खर्जुल, नितीन चिडे, नितीन खर्जुल आदी कार्यकर्त्यांनी या मोर्चाच्या सहभागाचे नियोजन केले आहे.