टीव्हीचा रिमोट न दिल्याने पत्नीची दगडाने ठेचून हत्या

मटा ऑनलाइन वृत्त | नाशिक

टेलिव्हिजन पाहण्याचं वेड माणसाला कोणत्या थराला नेऊ शकतं याचं अंगावर काटा आणणारं प्रकरण नाशिकमध्ये उघडकीस आलं आहे. टीव्हीचा रिमोट मागितल्यावर तो न दिल्याने पतीने आपल्या पत्नीची दगडाने ठेचून हत्या केल्याचा धक्कादायक प्रकार समोर आला आहे.

नाशिकच्या सिडको भागात दत्तनगर येथे राहणाऱ्या शोभा पांडूरंग मनवत्कर (३२) या महिला घरी टीव्ही पाहात असताना तिच्या पतीने तिच्याकडून रिमोट मागितला. मात्र, शोभा यांनी नकार दिल्यानंतर झालेल्या भांडणात पतीने पत्नीच्या डोक्यात दगड घालून तिच्या हत्या केली. धक्कादायक गोष्ट अशी की घटना घडली त्यावेळी त्यांच्या तीन मुली घरातच होत्या. अंबड पोलिसांनी याप्रकरणी गुन्हा दाखल करून घेतला असून पहाटे चार वाजत्या सुमारास ही घटना घडल्याचं पोलिसांनी सांगितलं आहे.