स्वच्छता, पर्यावरणासाठी विद्यार्थिनींची सायकल रॅली (फोटो)
नाशिकरोड : राष्ट्रीय सेवा योजना सप्ताह आणि महात्मा गांधी जयंतीनिमित्त स्वच्छता आणि पर्यावरणाबाबत जाणीव जागृती करण्यासाठी देशमुख महिला महाविद्यालयातर्फे परिसरात शनिवारी सायकल रॅली काढण्यात आली. या रॅलीला महापालिका गटनेते संभाजी मोरुस्कर, प्राचार्या लीना पांढरे, राष्ट्रीय सेवा योजना संचालक डॉ. जीवन सोळुंके, प्रा. सुषमा हसबनीस यांनी हिरवा झेंडा दाखविला. या रॅलीमध्ये विद्यार्थिनींनी विविध प्रबोधनात्मक घोषवाक्ये लिहिलेल्या फलकांद्वारे जनजागृती केली.
--
पोषण जनजागृती रॅली (फोटो)
नाशिकरोड : राष्ट्रीय पोषण अभियानांतर्गत नाशिक एकात्मिक बालविकास सेवा योजना प्रकल्प आणि देवळालीगावातील तक्षशिला विद्यालयातर्फे शनिवारी सकाळी परिसरात रॅलीद्वारे शिशूच्या सुदृढ वाढीसाठी मातेच्या संतुलित पोषणाबाबत जनजागृती केली. अधिकारी अजय फडोळ यांच्या मार्गदर्शनाखाली निघालेल्या रॅलीद्वारे राजवाडा, मालधक्का या भागात अंगणवाडी सेविका, मदतनीस आणि तक्षशिला शाळेच्या विद्यार्थ्यांनी पोषणाविषयी नागरिकांचे प्रबोधन केले. मुख्याध्यापक अनिल चव्हाण यांच्यासह मनोज अहिरे यांचे सहकार्य लाभले.
--
ट्रॅकचे आज भूमिपूजन
पंचवटी : हिरावाडी परिसरातील विभागीय क्रीडा संकुलासमोरील कालव्यापासून मुंबई-आग्रा महामार्गापर्यंतच्या एक किलोमीटरच्या भागात आधुनिक पद्धतीचा जॉगिंग ट्रॅक तयार करण्यात येणार आहे. त्याचे भूमिपूजन आज, रविवारी (दि. ३०) सकाळी १० वाजता आमदार बाळासाहेब सानप यांच्या हस्ते करण्यात येणार आहे. नगरसेवक रुची कुंभारकर, मच्छिंद्र सानप, नगरसेविका प्रियंका माने, पूनम मोगरे आदींची प्रमुख उपस्थिती राहणार आहे.
--
'सर्जिकल स्ट्राइक अभूतपूर्व' (फोटो)
नाशिक : भारतीय लष्कराने केलेले नियोजनबद्ध सर्जिकल स्ट्राइक अभूतपूर्व ठरणारे आहे, असे प्रतिपादन प्राचार्य डॉ. एम. एल. साळी यांनी केले. पिंपळगाव बसवंत येथील क. का. वाघ महाविद्यालयात राष्ट्रीय छात्रसेना आणि राष्ट्रीय सेवा योजनेतर्फे सर्जिकल स्ट्राइक डे साजरा झाला. त्यावेळी ते बोलत होते. प्राचार्या डॉ. एस. एस. घुमरे, सात महाराष्ट्र बटालियनचे सुभेदार नामदेव गुरव, एनसीसी अधिकारी प्रा. संदीप भिसे, एनएसएस अधिकारी प्रा. ज्ञानोबा ढगे व्यासपीठावर होते.